Magnús Gottfreðsson, smitsjúkdómalæknir og prófessor, segist skilja vel ákvörðun norskra yfirvalda um að bíða með að bólusetja með bóluefni AstraZeneca á meðan það fæst úr því skorið hvort orsakasamband sé milli bóluefnisins og myndun sjaldgæfra blóðtappa.
Íslensk yfirvöld fylgdu nágrannaþjóðunum þegar beðið var tímabundið með bóluefnið í síðasta mánuði en flestir ákváðu að aðeins eldri einstaklingar myndu fá bóluefnið þar sem aukaverkanirnar voru flestar hjá yngri einstaklingum, þá sérstaklega konum.
„Það er ekki vitað nákvæmlega hvernig bóluefnið virðist hrinda þessari atburðarás af stað en kynjahlutföllin í þessum rannsóknum studdu það sem áður hefur verið sagt að þetta er algengara í konum en körlum,“ segir Magnús í samtali við RÚV um málið.
Í gær var síðan tilkynnt að sóttvarnalæknir hefði ákveðið að konur undir 55 ára aldri myndu ekki fá bóluefnið, sem og bóluefni Janssen sem byggir á sömu tækni, en áður hafði verið miðað við að allir yngri en 70 ára myndu ekki fá bóluefnið.
Magnús vísar til þess að reglulega sé því haldið fram að ávinningurinn með bólusetningu sé meiri en áhættan en að það eigi síður við ef lítið er um smit í samfélaginu. „Þá má færa mjög sterk rök fyrir því að bíða með notkun bóluefna sem hafa þessa áhættu, jafnvel þó hún sé mjög lítil.“
