Magnús Geir Þórðarson, leikhússtjóri Þjóðleikhússins segist ekki kannast við umræðu um að leikhúsfólki leiðist klapp eftir leiksýningar og segir það vera leitt ef klapp yrði bannað eftir sýningar.
Elísabet Welding Sigurðardóttir vakti athygli á málinu á Twitter. „ Leikhúsfólk hefur rætt þennan sið hjá áhorfendum að klappa í lok sýningar og vilja mörg hver að þetta verði aflagt. Þetta er vinnan þeirra. Ef þú klappar fyrir kassastarfsmanni, lögfr. og hjúkrunarfr. þá er réttlætanlegt að klappa eftir leiksýningu. Þetta er pæling.“
Þjóðleikhússtjóri segir leikurum þyki líklegast vænt um klappið, eins og áhorfendum. „Þetta er auðvitað samspil á milli áhorfenda og leikara en ég held að þetta sé fyrst og fremst þakklæti eftir sýningu,“ segir Magnús.
Tístið hefur fengið mikla athygli og fólk hefur brugðist við tístinu á ýmsan hátt.
Þingmaðurinn Björn Leví Gunnarsson bendir á að eitt sinn hafi verið klappað eftir lendingu í flugvél.
„Er þá ekki vandamálið frekar að við klöppum ekki nóg? Klöppum meira fyrir fleirum,“ segir einn í svari við tístinu.
Magnús segir alveg mega klappa fyrir öðrum starfsstéttum, eins og strætóbílstjóra eða kassastarfsmanni. „En ég held þetta sé bara eins og þegar við þökkum fyrir okkur víða, fyrir þjónustu eða svoleiðis. Það væri leitt ef við myndum banna þetta,“ segir hann.
Leikhúsfólk hefur rætt þennan sið hjá áhorfendum að klappa í lok sýningar og vilja mörg hver að þetta verði aflagt. Þetta er vinnan þeirra. Ef þú klappar fyrir kassastarfsmanni, lögfr. og hjúkrunarfr. þá er réttlætanlegt að klappa eftir leiksýningu. Þetta er pæling.
— Elísabet Welding Sigurðardóttir (@ElisabetSigur) September 12, 2022
Einu sinni var klappað eftir lendingu í flugvél.
— Bjorn Levi (@_bjornlevi_) September 13, 2022
