Magnús Ólason, fyrrverandi framkvæmdastjóri lækninga á Reykjalundi, er í hópi þeirra rúmlega 800 Íslendinga sem greinst hafa með Covid-19. Magnús sagði frá þessu í opinni færslu á Facebook.
Magnús hrósar íslenskum heilbrigðisyfirvöldum í hástert og segir að þegar upp verður staðið muni heilbrigðisyfirvöld hér á landi fá hæstu mögulegu einkunn fyrir frammistöðu sína á alþjóðamælikvarða.
„Hafandi verið eitt af fórnarlömbum covid smitsins sl rúmar 2 vikur verð ég að segja að tríóið sem stýrir umræðunni og covid-teymi LSH og Heilsugæslunnar hefur sýnt algerlega einstæða fagmennsku. Það er fylgst mjög vel með sjúklingunum og hvað er tryggara en að fá upphringingu til að byrja með daglega frá hjúkrunarfræðingi eða öðru heilbrigðisstarfsfólki sem fer yfir stöðuna og gefur hughreystandi og fagleg ráð. Svo ef einhver versnun verður þá fær maður opna línu til sérfræðings til að ræða málin. Algjörlega frábært,“ segir hann.
Magnús tjáir sig um veikindin í samtali við RÚV en hann fór í sóttkví ásamt eiginkonu sinni eftir komuna frá Bandaríkjunum fyrir skemmstu. Ferðafélagi þeirra hafði greinst með COVID-19.
Magnús segir að veiran hafi ekki lagst þungt á hann og hann hafi aðallega fengið beinverki, hita og slappleika. Hann hafi talið að hann væri að verða hress síðastliðinn sunnudag en þá hafi hitinn komið aftur. Magnús segir að þessi pest sé ekki lík neinni sem hann hefur fengið um ævina.
„Þetta er algjör skítapest og allt öðruvísi. Maður er alveg þreklaus og drulluslappur,“ segir hann.
