Lýsir þungum áhyggjum: „Það velur sér enginn að missa vinnuna!“

„Sam­eyki hafnar því að hækkun at­vinnu­leysis­bóta leiði til þess að fólk velji sér að lifa á bótum. Það velur sér enginn að missa vinnuna!“

Þetta segir í til­kynningu sem Sam­eyki stéttar­fé­lag í al­manna­þjónustu hefur sent frá sér. Fé­lagið harmar þá stöðu sem upp er komin hjá fé­lags­mönnum þess á Reykja­nesi nú þegar Isavia og Frí­höfnin hafa sagt upp næstum 200 manns síðustu daga. Þessi fjöldi er til við­bótar þeim sem áður höfðu fengið upp­sagnir eða lækkað starfs­hlut­fall.

„Það er mikið á­fall að stór fyrir­tæki á borð við þessi tvö missi verk­efni sín svo til á einu bretti. En það er hins vegar mikil­vægt að þau sýni sam­fé­lags­lega á­byrgð og komi til móts við starfs­fólk sitt eins og kostur er meðan þetta tíma­bundna á­stand varir,“ segir í til­kynningunni og það tekið fram að mann­auður hvers fyrir­tækis sé mikil­vægur. Þá taki langan tíma að byggja upp þá þekkingu sem hefur skapast hjá starfs­fólki.

„Sam­eyki stéttar­fé­lag hvetur Isavia og Frí­höfnina til að gera allt sem í þeirra valdi stendur til að halda ráðningar­sam­bandi við starfs­fólk sitt eins og kostur er.“

Í til­kynningunni segir að staða fé­lags­manna sé flókin og ó­vissan mikil á meðan beðið er eftir að hægt verði að hefja vinnu í flug­stöðinni að nýju.

„Þessi hópur bætist við þann stóra hóp sem þegar er at­vinnu­laus á Reykja­nesi og nú sem aldrei fyrr er mikil­vægt fyrir stjórn­völd að grípa inn í og skapa störf við hæfi.“

Bent er á að í júlí hafi at­vinnu­leysi á Suður­nesjum mælst 16,5% en meira meðal kvenna, allt upp í 19%. Það er með því mesta sem fé­lagið hefur séð. „At­vinnu­leysi meðal kvenna hefur aukist hraðar en karla og byggingar­fram­kvæmdir og ný hafnar­mann­virki munu ekki ná að virkja þann hóp til at­vinnu­þátt­töku.“

Þá er bent á að hlut­fall þeirra sem hafa verið at­vinnu­lausir í 6 mánuði og lengur muni hækka tölu­vert næstu vikur og mánuði. Því sé mikil­vægt að stjórn­völd beiti sér með mark­vissum hætti til að tryggja af­komu þessa fólks. Það megi til dæmis gera með sköpun nýrra starfa, lengingu á tekju­tengdum at­vinnu­leysis­bótum og hækkun at­vinnu­leysis­bóta sem er eitt stærsta hags­muna­mál þessa hóps.

„Sam­eyki hafnar því að hækkun at­vinnu­leysis­bóta leiði til þess að fólk velji sér að lifa á bótum. Það velur sér enginn að missa vinnuna!,“ segir í til­kynningunni.