Breski blaðamaðurinn Rob Dorsett, sem staddur er hér á landi vegna leiks Íslands og Englands í Þjóðadeildinni á laugardag, lýsir reynslu sinni af því að vera í sóttkví hér á landi.
Rob, eins og aðrir ferðamenn sem koma til Íslands, þurfti að gangast undir sýnatöku við komuna til landsins og fara svo í sóttkví uns niðurstöður úr seinni skimun liggja fyrir. Í pistli á vef Sky Sports lýsir Rob reynslu sinni af því að vera innilokaður á hótelherbergi ásamt myndatökumanni sínum, Scott Drummond.
Rob nefnir ekki hótelið sem hann dvelur á en hann segir að bæði veitingastaðurinn á hótelinu og líkamsræktarsalurinn sé lokaður vegna COVID-19 faraldursins.
„Það er engin herbergisþjónusta. Bara listi af veitingastöðum og kaffihúsum sem við getum reynt að hringja í til að senda okkur mat. Á laugardagskvöldið var of mikið að gera á öllum þessara staða til að það væri hægt. Ein þjónusta býður upp á heimsendingu en í okkar tilviki var ekki tekið við bresku greiðslukorti,“ segir hann.
Hann segir að í tvo daga hafi þeir félagar nærst á ávöxtum, kartöfluflögum, hnetum og útrunnu sushi-i sem þeir höfðu keypt við komuna til landsins. Að lokum náðu þeir að sannfæra stað í nágrenninu um að senda mat, en Rob bendir á að það hafi tekið langa stund og maturinn verið kominn um miðnætti.
„Flestir Íslendingar sem við höfum mætt eru hræddir við okkur – við lítum augljóslega út fyrir að vera útlendingar og þeir halda sig fjarri. Þegar við fórum í 10 mínútna göngutúrinn okkar á sunnudag spurðum við starfsmann veitingastaðar, fyrir utan staðinn, hvort hún gæti mögulega sent okkur mat. Hún hrifsaði matseðilinn af okkur, sagði að staðurinn byði ekki upp á slíka þjónustu og strunsaði í burtu.“
Pistil Robs má lesa í heild sinni hér.
