Lögregla leitar nú að þremur rúmenskum karlmönnum sem komu hingað til landsins fyrir fjórum dögum en mennirnir komu til landsins með þremur öðrum karlmönnum sem voru handteknir fyrir þjófnað á Suðurlandi í gær.
Tveir þeirra reyndust vera smitaðir af COVID-19 en þeir hefðu átt að vera í tveggja vikna sóttkví líkt og aðrir sem koma til landsins. Við frekari rannsókn kom í ljós að mennirnir voru með virk smit og þurfa því nú að sæta einangrun. Þá eru fjórtán lögreglumenn í sóttkví vegna málsins og verður fylgst vel með þeim næstu daga.
Sjá einnig: Greint frá þremur nýjum smitum í dag
Að því er kemur fram í frétt RÚV um málið hefur bakvakt smitrakningarteymis Almannavarna verið kölluð út til að aðstoða við leitina sem er stýrt af lögreglunni á höfuðborgarsvæðinu og á Suðurlandi. Að sögn Víðis Reynissonar yfirlögregluþjóns verður líklega lýst eftir mönnunum í kvöld.
RÚV greinir enn fremur frá því að mennirnir sem leitað er hafi gefið upp ákveðna staðsetningu þar sem þeir ætluðu að dvelja á meðan sóttkví stendur en reyndust síðan ekki vera þar. Engar vísbendingar hafa borist um ferðir mannanna.
Oddur Árnason, yfirlögregluþjónn á Selfossi, sagði í samtali við Fréttablaðið að mögulega gætu mennirnir sem voru handteknir tengst skipulagðri glæpastarfsemi en tók fram að hinna mannanna væri aðeins leitað til að tryggja að farið yrði eftir reglum um sóttkví.
