Einn lögreglumaður hjá Lögreglunni á höfuðborgarsvæðinu hefur verið greindur með COVID-19. Þetta kemur fram í tilkynningu frá lögreglu en þar segir að ekki sé talið að viðkomandi hafi smitast við störf sín hjá embættinu.
„Gripið var til allra viðeigandi ráðstafana strax og málið kom upp í gær og voru þrettán aðrir lögreglumenn sendir í sóttkví vegna þessa, en að auki eru fimm lögreglumenn til viðbótar í úrvinnslusóttkví. Nú er unnið að því að tryggja mönnun á vaktir vegna þeirrar stöðu sem upp er komin og miðar þeirri vinnu vel,“ segir í tilkynningu lögreglu.
Þá segir að embættinu hafi verið skipt upp í sótthólf frá og með hádegi sl. föstudag, 31. júlí, og því hefur ofangreint áhrif á eina lögreglustöð í umdæminu, en ekki allar fjórar.
Ekki er hægt að veita frekari upplýsingar að svo stöddu.
