Margeir Sveinsson, aðstoðaryfirlögregluþjónn hjá lögreglunni á höfuðborgarsvæðinu, segir mjög slæmt að persónugreinanlegum upplýsingum úr rannsókn sakamáls hafi verið dreift víða.
Á annað hundrað síðum úr viðkvæmri rannsókn Héraðssaksóknara á meintri spillingu innan fíkniefnalögreglunnar var lekið til fjölmiðla fyrir helgina. Í samtali við RÚV sagði Margeir það vera mjög alvarlegt.
Hann sagði einnig að skoðað yrði hvort verkferlum yrði breytt. „Lögreglan hefur heimild til að vera í samskiptum við uppljóstrara og síðan er hver og einn einstaklingur skoðaður.“
Mega greiða fyrir upplýsingar
Margeir sagði lögregluna ekki nota uppljóstrara sem stunduðu sífelld afbrot. Ekki tíðkaðist heldur að halda hlífðarskildi yfir uppljóstrurum. „Nema þá að því leytinu til að þeir njóta nafnleyndar. Þess vegna er þetta afar slæmt.“
Í reglugerð um sérstakar aðferðir og aðgerðir lögreglu við rannsókn sakamála frá 2011 segir meðal annars að lögreglumanni sé óheimilt að gefa uppljóstrara fyrirheit um ívilnanir, slíkt sé ólöglegt og ekki á valdi lögreglu.
Þar kemur einnig fram að heimilt sé að greiða uppljóstrara fyrir upplýsingar og koma þannig í veg fyrir alvarlegt brot. Það sé lögreglustjóra að meta endanlega heimild fyrir slíkri greiðslu.
