Lögreglan á höfuðborgarsvæðinu hefur sent frá sér tilkynningu vegna atviksins í Ásmundarsal á Þorláksmessu þar sem Bjarni Benediktsson fjármálaráðherra var á meðal gesta.
Í tilkynningunni kemur fram að lögregla rannsaki nú nokkurn fjölda mála vegna hugsanlegra brota á sóttvarnalögum og varðar eitt þessara mála atvikið í Ásmundarsal sem mikið hefur verið spurt um, að sögn lögreglu.
„Formleg rannsókn er hafin í málinu, sem m.a. felst í því að verið er að yfirfara upptökur úr búkmyndavélum lögreglumanna sem mættu á staðinn með tilliti til brota á sóttvörnum. Ekki er unnt að greina frekar frá rannsókn málsins að svo stöddu.“
Bjarni Benediktsson var í gleðskapnum þegar lögregla kom á vettvang en mjög hefur verið þrýst á hann að segja af sér sem ráðherra vegna málsins. Bjarni hefur beðist afsökunar en telur ekki tilefni til að segja af sér.
