Fimm einkennalausir einstaklingar í einangrun ætla láta reyna á lögmæti einangrunarinnar fyrir Héraðsdómi Reykjavíkur á morgun. Þetta kemur fram ífrétt Fréttablaðsins.
Arnar Þór Jónsson, lögmaður fimmmenninganna, segir þar að verið sé að láta reyna á hvort PCR-próf eitt á sér sé nóg til að frelsissvipta fólk.
„Þetta snýst um það að þessir ágætu einstaklingar eru í einangrun út af þau hafa mælst jákvæð á PCR-prófum en eru einkennalaus. Í rauninni er verið að láta reyna á það hvort að sá grunnur, sem sóttvarnarlæknir byggir allar þessar aðgerðir sínar, á eigi sér vísindalega trausta stoð,“ segir Arnar í samtali við Fréttablaðið.
„Þá erum við að tala um það hvort þessi PCR-próf séu þannig vísindalega marktæk að það sé hægt að svipta einkennalausa einstaklinga frelsi á þeim grunni. Ég mun byggja á því að morgun að það sé nú bara þannig að víða erlendis hafa þessi próf verið talin ómarktæk og ég ætla láta reyna það,“ bætir Arnar við.
Í dag séu 3.526 í einangrun og 5.109 í sóttkví sem er met en á jóladag greindust 472 með kórónuveiruna.
Arnar segir samfélagið komið á þann stað að það megi ekki efast um neitt sem sóttvarnalæknir gerir en það sé hins vegar mikilvægt að láta reyna á valdmörk valdhafa.
„Við sem borgarar hljótum að hafa rétt og í raunar skyldu til að láta reyna á það hvar valdmörk framkvæmdavaldsins eru gagnvart mér og þér,“ segir Arnar.
