„Við þekkjum öll þetta fólk. Þau eru vinir okkar, fjölskylda eða vinnufélagar. Oft skemmtilegasta fólkið, skynsamt og mikil gleði sem fylgir því. Af og til kannski smá vesen á því og stundum gerir það eitthvað sem okkur finnst pínu bjánalegt en gera það ekki allir?,“ segir fjölmiðlamaðurinn Logi Bergmann Eiðsson í vikulegum pistli sínum í Morgunblaðinu.
Logi skrifar þar um SÁÁ en í gærkvöldi fór fram söfnunarþáttur á RÚV þar sem yfir 42 milljónir króna söfnuðust. Logi bendir á að öll þekkjum við einstaklinga sem ef til vill eiga í vandræðum þegar áfengi er annars vegar.
„Smám saman tökum við eftir því að þetta gerist kannski full oft. Við sýnum því þolinmæði, því það er það sem maður gerir við vini sína. Smám saman verður til einhvers konar mynstur sem segir okkur að þegar liðið er á kvöldið sé kannski mesta skynsemin að færa sig aðeins frá þeim. Það er eins og það breytist í aðra manneskju,“ segir hann og bætir við að við séum jafnvel hætt að kippa okkur upp við sögur sem enduðu á versta veg. Það verði þó augljóst að hér sé vandamál á ferð.
„Veikindadögum fjölgar. Upp rennur sú stund að við gerum okkur grein fyrir því að þetta ástand getur ekki talist eðlilegt og viðkomandi sé hreinlega veikur. Það nær jafnvel svo langt að allir sjá það nema sjúklingurinn sjálfur. Hann er alkóhólisti.“
Logi tekur fram að hann hafi ekkert vit á alkóhólisma þó hann þekki mörg dæmi.
„En ég er mjög áhugasamur og vinir mínir sem hafa hætt að drekka hafa samviskusamlega svarað spurningum mínum, sem sumar eru sennilega frekar bjánalegar. Vinur minn, sem er mér sérlega kær, hefur sagt mér frá hverju skrefi í þessu ferli - frá fullkomnu vonleysi til bata. Um leið hefur mér fundist einstaklega merkilegt að fylgjast með því hvernig hann hefur nýtt þetta ferli til að finna og rækta sínar bestu hliðar.“
Logi segist vera nokkuð viss um að hann – og reyndar fleiri vinir hans – væru ekki hér ef ekki væri fyrir SÁÁ. „Samtök sem eiga sér merkilega sögu. Stofnuð af fyllibyttum fyrir rúmum 40 árum. Á tímum þegar það þótti aumingjaskapur að hafa ekki stjórn á drykkju sinni eða ná í það minnsta að fela hana nógu vel til að komast í gegnum daginn.“
Logi segir að margt hafi breyst á þessum árum þó alkóhólisminn sé ekki að fara neitt. Ekki frekar en meðvirknin sem fylgir sjúkdómnum og litar líf fjölskyldna um allt land og allan heim.
„Það er enn til fólk sem lítur þannig á að svo fremi sem það geti stundað vinnu, þá sé allt í lagi og þetta komi engum við. Kannski breytist það einhvern tímann.“
Logi segist hafa gefið í söfnun SÁÁ með glöðu geði og bendir hann á að það sé enn hægt.
„Ég geri það fyrir vini mína sem hafa náð bata og líka þá sem náðu honum aldrei. Kannski sérstaklega þá. Og svo er líka sjálfsagt að velta því bara fyrir sér hver staðan væri ef við værum í sömu sporum og við vorum fyrir rúmlega 40 árum. Það er ekki spennandi tilhugsun.“
