„Flökkusagan sem gekk um er hræðileg. En þetta lúkkar nákvæmlega eins og falsfréttir sem ganga um á facebook síðum þjóðernissinna víðsvegar um Evrópu.“
Þetta segir tónlistarmaðurinn Logi Pedro Stefánsson um flökkusögu um hræðilega hópnauðgun sem var sögð hafa átt sér stað á dögunum. Fréttablaðið greindi frá málinu en samkvæmt sögunni, sem gekk meðal annars á Instagram og Twitter, var ung íslensk kona numin á brott af hópi erlendra manna í miðborg Reykjavíkur og henni nauðgað úti á Gróttu á Seltjarnarnesi.
Í sögunni var fullyrt að mennirnir væru frá ákveðnu Austur-Evrópulandi. Stúlkan hafi svo komist undan með því að hoppa út úr bíl mannanna á ferð. Ævar Pálmi Pálmason, yfirmaður kynferðisbrotadeildar lögreglunnar á höfuðborgarsvæðinu, sagði við Fréttablaðið að hann kannaðist við söguna en ekkert slíkt mál væri til rannsóknar.
Málið vekur ýmsar spurningar um falsfréttir og umræðuna almennt á samfélagsmiðlum. Logi, sem hefur látið töluvert til sín taka í umræðum um rasisma og kynþáttahyggju, segir í færslu sinni að ekki megi gleyma einni stærstu ógn okkar tíma sem eru kynþáttahyggja, þjóðernissinnar og falsfréttir þeirra.
Flökkusagan sem gekk um er hræðileg. En þetta lúkkar nákvæmlega eins og falsfréttir sem ganga um á facebook síðum þjóðernissinna víðsvegar um Evrópu.
— Logi Pedro (@logipedro101) June 2, 2021
Ekki gleyma einni stærstu ógn okkar tíma sem eru kynþáttahyggja, þjóðernissinnar og falsfréttir þeirra.https://t.co/boULeV4zHT
