Lögðust gegn ráðningu Þor­valdar: „Ná­kvæm­lega svona sem Sjálf­stæðis­flokkurinn starfar“

„Þetta er hneyksli,“ segir Guð­mundur Andri Thors­son, þing­maður Sam­fylkingarinnar, um þá frétt Kjarnans að efna­hags- og fjár­mála­ráðu­neytið hefði lagst gegn því að Þor­valdur Gylfa­son, prófessor í hag­fræði, yrði ráðinn rit­stjóri fræða­tíma­ritsins Nor­dic Economic Poli­cy Revi­ew.

Kjarninn greinir frá því í morgun að starfs­maður ráðu­neytisins hefði komið þeim skila­boðum til fjár­mála­ráðu­neyta á Norður­löndunum og til Nor­rænu ráð­herra­nefndarinnar að ráðu­neytið gæti ekki stutt það að Þor­valdur yrði ráðinn. Var á­stæðan sögð sú að hann væri of pólitískt virkur og enn for­maður stjórn­mála­afls.

Þetta er rangt því Þor­valdur hefur ekki gegnt trúnaðar­störfum fyrir stjórn­mála­flokk síðan 2013, en það ár leiddi hann Lýð­ræðis­vaktina í Al­þingis­kosningunum. Flokkurinn kom ekki manni að í kosningunum. Þor­valdur segir við Kjarninn að ljóst er að rang­færslurnar komu í veg fyrir að hann fengi rit­stjóra­starfið en ráðning hans var aftur­kölluð í nóvember síðast­liðnum.

Frétt Kjarnans hefur vakið tals­verða at­hygli og vandar Helga Vala Helga­dóttir, þing­maður Sam­fylkingarinnar, Sjálf­stæðis­flokknum ekki kveðjurnar.

„Það er ná­kvæm­lega svona sem Sjálf­stæðis­flokkurinn starfar. Ef þú ert ekki með þeim í liði þá ertu of pólitískur,“ segir hún.

Hún segir að þetta geri það að verkum að megin­þorri lög­manna, hag­fræðinga og annarra sér­fræðinga um ýmis­legt er varðað getur stjórnar­hætti veigra sér við að tjá sig.

„Það er líka þess vegna sem fjöl­miðla­fólk margt hvert hikar frekar en að fjalla um. Það er þess vegna sem þeir sem tjá sig fá spurninguna “hvernig þorirðu að taka þennan slag?” Það er vegna þess að Sjálf­stæðis­flokkurinn hikar ekki við að reyna að hafa störf af heið­virðu fólki eða e.a. koma í veg fyrir slíkar stöðu­veitingar. Sjálf­stæðis­flokkurinn er í ríkis­stjórn í boði VG. Við skulum muna það.“

Jón Þór Ólafs­son, þing­maður Pírata, veltir fyrir sér hvort um sé að ræða mis­beitingu á valdi ráðu­neytisins. Hann merkir kollega sína í Pírötum, þing­mennina Smára Mc­Cart­hy og Björn Leví Gunnars­son, í þræði á Pírata­spjallinu á Face­book og spyr: „Er ekki hægt að láta þing­nefnd annar hvors ykkar kalla ráðu­neytið á teppið og rann­saka málið?“

Smári á sæti í efna­hags- og við­skipta­nefnd Al­þingis en Björn Leví á sæti í fjár­laga­nefnd.