Lóa Pind Aldísardóttir, stjórnandi þáttanna Kjötætur óskast!, hefur svarað þeirri gagnrýni sem sett er fram á þætti hennar í Facebook-hópnum Vegan Ísland og fjallað var um á Hringbraut í gærkvöldi.
Lokaþátturinn var sýndur á mánudagskvöld en í þáttunum var fylgst með fjórum fjölskyldum sem prófa að gerast vegan í einn mánuð. Lóa Pind tók einnig þátt í tilrauninni en gafst upp að þessum fjórum vikum liðnum. Sagðist Lóa hafa saknað þess að geta ekki fengið hina heilögu þrenningu: Nautakjöt, rauðvín og Coca Cola Light.
Sjá einnig: Þættir Lóu Pindar gera allt vitlaust: „Mér fannst þetta alveg glataðir þættir“
Nokkur gagnrýni kom fram á þættina í umræddum Facebook-hópi í gær. Vala Árnadóttir, framkvæmdastýra Samtaka grænkera á Íslandi, hóf umræðuna og sagði:
„Öööööö veit Lóa Pind ekki að Coke Light og flest rauðvín eru vegan? Amk. Þau rauðvín sem eru góð. Voðalega er þetta þunnur þrettándi.“
Frekari gagnrýni kom fram á þættina, meðal annars frá Júlíu Sif Liljudóttur sem hefur gefið út bók fyrir grænkera. Sagðist hún vera þeirrar skoðunar að þættirnir væru glataðir og einblíndu á hvað veganismi væri glataður. Aðrar athugasemdir voru í svipuðum dúr.
Sjá einnig:Ævar vildi ekki taka þátt í veganþætti Lóu: „Myndi ekki þola 4 vikur af þriðja flokks næringu“
Vala gagnrýndi Lóu meðal annars fyrir meint viðhorf hennar til veganisma sem hún segir að hafi skinið í gegn í þáttunum. „En að lofsama kjöt og gretta sig yfir vegan mat í hverjum einasta þætti er engin leið til að auka neyslu á grænkerafæði. Þú varst vísvitandi að ýta undir fordóma fyrir vegan lífsstíl til að búa til raunveruleikasjónvarp sem hneykslar, til hamingju þér tókst það.
Lóa Pind svaraði þessum gagnrýnisröddum og ávarpaði meðal annars Völu, framkvæmdastjóra Samtaka grænkera.
„Mér er fullkunnugt um – enda gerði ég fimm þátta sjónvarpsseríu um það – að það er staðreynd að kolefnisspor grænkeramatar er minna. En það er ofsatrú þegar rörsýn er farin að hindra fólk í að eiga eðlileg skoðanaskipti. Þegar fólk plantar sér á háan hest og telur sig hafa höndlað sannleikann sem leyfir því að drulla yfir hina trúlausu. Þú færð engan í lið með þér með þeirri aðferð. Varðandi faglegheit. Það er langþekkt aðferð þáttastjórnanda í heimildaþáttum að taka sjálfir þátt í eigin tilraunum – að setja sig í spor viðmælenda,“ sagði Lóa Pind og nefndi til dæmis Morgan Spurlock sem gerði heimildarmyndina Super Size Me.
„Ég fór fordómalaus inn í þessa vegferð, vissi mætavel að kolefnissporið væri líklega minna en hafði enga hugmynd um hvernig færi með heilsufarsmælingarnar. Fékk þess vegna fjölbreyttan hóp af fólki - sem ákveðið þversnið af þjóðfélaginu – til þess að fá sem heilbrigðasta niðurstöðu. Vegna þess – að ef stór hluti þjóðarinnar – ákvæði að borða meira af veganmat, þá yrði það ekki undir handleiðslu sérfræðinga. Það yrði við svipaðar aðstæður og gert var í þessari tilraun. Það er hins vegar orðið kýrskýrt við að fylgjast með umræðunni hér að það er ekki í boði að fara fordómalaus inn í svona tilraun – það er einungis í boði að vera fyrir fram sannfærður og gera „tilraun“ sem gefur fyrir fram gefna niðurstöðu. En mér þætt vænt um, Vala Árnadóttir, að við gætum rætt þetta eins og 2 siðaðar fullorðnar manneskjur að tala um álitamál í nútímasamfélagi. Án þess að þú setjir þig á háan hest – og án þess að níða mig niður.“
Sjá einnig: Lóa Pind með játningu: Þess vegna er hún ekki lengur vegan
