Manni sem átti erindi á Landspítalann í Fossvogi í gær og hugðist leggja bílnum sínum í stæði fyrir hreyfihamlaða brá í brún þegar hann sá að búið var að setja ljósastaur fyrir framan stæðið sem hann ætlaði að leggja í.
Í svari við fyrirspurn segir Birna Helgadóttir, forstöðumaður aðfanga og umhverfis á þjónustusviði Landspítalans, að unnið sé að breytingum og lagfæringum á aðkomu að spítalanum í Fossvogi til auka öryggi sjúklinga og gestkomandi. Aðeins fyrsta áfanga verksins er lokið og stæðið sem um ræðir sé bráðabirgðalausn meðan framkvæmdir standa yfir. Þau eru staðsett þar sem aðalgönguleið frá bílastæðum verður eftir að öðrum áfanga verksins er lokið.
Gert er ráð fyrir að annar áfangi verksins hefjist brátt og verður þá aðstaða fyrir bíla hreyfihamlaðra flutt á endanlegan stað. Birna segir að unnið hafi verið í samráði við Öryrkjabandalagið um framkvæmdirnar og fengið góðar ábendingar.
„ Aðgengi fyrir alla er okkur mjög hugleikið og vinnum við stöðugt að því að bæta aðstöðu við byggingar okkar til að tryggja öryggi og auðvelda aðgengi að þeim. Þetta er mikið verk þar sem byggingar Landspítala eru um 150.000 fermetrar og við þetta bætast lóðir og bílastæði“, segir Birna. Tekið sé við öllum ábendingum um hvað megi betur fara og hvetur hún fólk til að hafa samband við spítalann hafi það einhverjar athugasemdir eða hugmyndir.
