„Ég verð að segja að mér hugnast frumvarpið vel. Það er eins og mælt út úr mínum munni,“ sagði Jón Steindór Valdimarsson, þingmaður Viðreisnar, í umræðum um störf þingsins á Alþingi í gær.
Þar lýst Jón skoðun sinni á mannanafnafrumvarpi Áslaugar Örnu Sigurbjörnsdóttur dómsmálaráðherra þess efnis að mannanafnanefnd verði lögð niður. Tilkynnt var um þetta í þingmálaskrá sem lögð var fram á dögunum.
Jón Steindór vann að sama máli fyrir rétt um ári síðan. „Það var mannanafnafrumvarp sem flutt var af þáverandi þingmanni og samflokksmanni mínum í Viðreisn, Þorsteini Víglundssyni. Það var kolfellt hér í þinginu á þeim tíma,“ rifjaði Jón Steindór upp og bætti við að nafn væri nátengt sjálfsmynd og sjálfsvitund fólks. Það varði fyrst og fremst einkahagi og persónurétt.
„Í núgildandi mannanafnalögum eru lagðar víðtækar takmarkanir á rétt fólks til að stýra þessum rétti, takmarkanir sem ekki verða rökstuddar með vísan til almannahagsmuna eða annarra hagsmuna sem réttlætanlegt er að byggja á í nútímasamfélagi. Fólki á að vera treyst til að ráða sjálft nafni sínu,“ sagði hann.
Jón Steindór sagði að meginmunurinn á frumvörpunum tveimur væri sá að í frumvarpi Þorsteins hafi verið gert ráð fyrir aðkomu barnaverndaryfirvalda en í frumvarpi ráðherra verði leitað umsagnar umboðsmanns barna.
„Sá er nú allur munurinn. Ég held reyndar að það séu litlar líkur á að foreldrar gefi börn sínum meiðandi nöfn. Allt að einu þá óska ég hæstvirtum ráðherra velgengni með hið ætlaða frumvarp og að henni takist að fullvinna það og leggja fram tímanlega svo að það geti fengið umfjöllun og afgreiðslu hér á þingi. Einnig óska ég þess að henni takist að koma því í gegnum ríkisstjórn sína án þess að það missi grundvallarmarkmiðið um að fólk ráði eigin nafni. Ég óska henni einnig sérstaklega velfarnaðar í því að koma málinu í gegnum eigin flokk en þar hefur brugðið við að menn séu frjálslyndir einungis í orði en ekki á borði.“
