Pétur Gunnarsson, einn þekktasti rithöfundur landsins, líkir Vladimír Pútín Rússlandsforseta við Adolf Hitler, einræðisherra Þýskalands á árunum 1933 til 1945.
Pétur birtir grein í Fréttablaðinu í dag.Þar bendir hann á að það gleymist oft að Hitler hafi lengst af á sinni tíð verið talinn fínasti pappír. Hann hafi meðal annars prýtt forsíðu Times sem stjórnmálamaður ársins 1938 og komið til álita sme friðarverðlaunahafi Nóbels ári síðar, sama ár og síðari heimsstyrjöldin hófst.
„Það er ástæða til að rifja þetta upp nú þegar austur í Rússlandi er risinn leiðtogi sem minnir á fátt annað en Adolf í aðdraganda heimsstyrjaldarinnar síðari. Og hefur sér til fulltingis hliðstæðuna við Göbbels, sem nú heitir Lavrov,“ skrifar Pétur í blað dagsins.
Pétir segir Pútin horfa á sama hátt til hruns Sovétríkjanna og Hitler notfærði sér niðurlægingu Þjóðverja eftir fyrri heimsstyrjöldina. Og fari fyrir vikið jafn mikinn í yfirganginum.
„Annað sem kallar á samanburð við Hitlerstímann er ósvífnin í málflutningnum, hvernig bláköldum staðreyndum er neitað og svart sagt hvítt. Þannig varðar það 15 ára fangelsi ef einhver vogar sér að halda því fram að rússneski herinn hafi ráðist inn í Úkraínu …“
Pétur segir það vekja hjá sér mestan ugg „hve rækilega þeir Pútín/Lavroff hafa drullað upp á bak, svo mjög að erfitt er að sjá að Rússland undir þeirra stjórn eigi afturkvæmt í samfélag þjóðanna. Þegar eins var komið fyrir þeim Hitler og Göbbels styttu þeir sér og sínum aldur og reyndu að draga heiminn með sér í fallinu. Og munaði ekki nema því sem munaði að það tækist. Nú er sá munur ekki lengur til staðar, Pútín heldur á vopninu sem Hitler vanhagaði um og hefur þegar hótað að beita því.“
Grein Péturs í heild sinni í Fréttablaðinu í dag
