Líf Magneudóttir borgarfulltrúi Vinstri grænna er í áfalli eftir að hafa hlustað á Ragnhildi Öldu, frambjóðanda Sjálfstæðisflokksins, á Útvarpi sögu. Líf deilir sögunni á Twitter.
„Var rétt í þessu að klára að hlusta á ungan frambjóðanda boða sturlaða afturför í þróun Reykjavíkur,“ skrifar Líf.
„Og hunsa öll þau brýnu verkefni framundan m.a. í baráttunni við loftslagsvána. Þarf smá að jafna mig…“
Í þræðinum segist Líf hafa verið að hlusta á Ragnhildi Öldu Maríu Vilhjálmsdóttur á Útvarpi sögu. Ragnhildur sækist eftir 1. sæti í prófkjöri Sjálfstæðisflokksins og var gestur Pétur Gunnlaugssonar.
Sagðist hún meðal annars ekki vera fylgjandi borgarlínunni, heldur frekar léttlínukerfi, þar sem borgarlínan sé of dýr. Hún segir þetta eitt af þeim atriðum þar sem borgaryfirvöld eru að reyna að stjórna fólki og því hvernig það hagar sínu lífi, þar með talið hvaða samgöngumáta það kýs.
„Þarna eru borgaryfirvöld og stjórnmálamenn í ráðhúsinu að reyna að stýra því og taka ákvörðun fyrir fólk að því forspurðu sem að býr þarna og er með fyrirtæki sín þarna, sitt lifibrauð, hvernig það ferðast um í borgarlandinu og hvernig það hagar sínu lífi, þetta er alveg þvert á mín grunngildi, það er bara peningasóun að ráðhúsið sé að setja tíma og orku í þetta“, segir Ragnhildur, að því er fram kemur á vef Útvarps Sögu.
Var rétt í þessu að klára að hlusta á ungan frambjóðanda boða sturlaða afturför í þróun Reykjavíkur og hunsa öll þau brýnu verkefni framundan m.a. í baráttunni við loftslagsvána. Þarf smá að jafna mig…
— Líf Magneudóttir (@lifmagn) March 10, 2022
