Leynd virðist ríkja yfir því hvaða fjárfestar keyptu rúmlega 12 prósenta hlut Landsbankans í Stoðum í desember síðastliðnum fyrir 3,3 milljarða króna. Kjarninn fjallar um málið á vef sínum í dag og segir að hvorki Landsbankinn né Stoðir telji sig geta veitt upplýsingar um hvaða fjárfestar keyptu hlut bankans.
Svohljóðandi tilkynning birtist á heimasíðu Landsbankans þann 10. desember síðastliðinn:
„Landsbankinn hefur selt eignarhlut sinn í Stoðum hf. í opnu söluferli, en frestur til að skila inn tilboðum í söluferlinu var til kl. 17.00 þriðjudaginn 8. desember sl. Landsbankinn auglýsti opið söluferli á allt að 12,1% eignarhlut sínum í fjárfestingafélaginu Stoðum hf. þann 23. nóvember sl.“
Í umfjöllun Kjarnans er þess getið að þar sem Stoðir eru óskráð félag er hluthafalisti ekki aðgengilegur á vef félagsins og þá hefur gögnum um breytingu á eigendahópi Stoða ekki verið skilað til fyrirtækjaskrár. Kjarninn óskaði eftir upplýsingum frá Landsbankanum, Stoðum og Fossum mörkuðum, sem lögðu fram tilboðið fyrir hönd hinna ónafngreindu fjárfesta, en kom alls staðar að lokuðum dyrum.
Í lok júní síðastliðnum námu heildareignir Stoða 25 milljörðum króna og var eigið fé einnig um 25 milljarðar króna hjá félaginu sem er óskuldsett. Stoðir, sem hétu áður FL Group, eiga tæplega 5 prósenta hlut í Arion banka og tæplega 10 prósenta hlut í tryggingafélaginu TM. Þá á félagið rúmlega 8,2 prósenta hlut í Kviku banka og tæplega 15 prósenta hlut í Símanum.
Ítarleg umfjöllun Kjarnans um málið.
