Harmleikur átti sér stað á dögunum þegar nýgift bandarísk hjón, Mohammad Malik og Noor Shah, létust af slysförum á Turks- og Caicoseyjum í Karíbahafinu.
Malik, 35 ára, og Shah, 29 ára, voru búsett í New York og gengu þau í hjónaband í lok októbermánaðar. Fjórum dögum síðar voru þau stödd í Karíbahafinu til að fagna þessum tímamótum en þá dundu ósköpin yfir.
Hjónin voru að kafa í sjónum skammt frá hótelinu sem þau dvöldu á, en mikið útsog var á þessum slóðum umræddan dag. Þau lentu fljótlega í vandræðum en nærstöddum tókst að koma þeim í land nokkru síðar. Endurlífgunartilraunir báru hins vegar ekki árangur og voru hjónin úrskurðuð látin.
Newsday greinir frá því að Malik hafi verið lögfræðimenntaður en Shah var í framhaldsnámi í læknisfræði. Faðir Maliks, Maqbool, segir að engin viðvörunarskilti hafi verið við ströndina þegar harmleikurinn átti sér stað.
