Eldur kom upp í íbúðarhúsi í uppsveitum Borgarfjarðar síðdegis í gær. Í tilkynningu sem birtist á Facebook-síðu Lögreglunnar á Vesturlandi nú á tíunda tímum í morgun kemur fram að tilkynnt hafi verið um eldinn um klukkan 17:30.
Þegar slökkvilið og lögregla komu á staðinn var íbúðarhúsið alelda. „Aðstæður til slökkvistarfs voru erfiðar en slökkvilið náði tökum á eldinum um þremur tímum eftir komu á vettvang. Húsið er gjörónýtt.“
Þá kemur fram að slökkvistarfi hafi lokið um klukkan 23 í gærkvöldi en að því komu slökkvilið frá öllum starfsstöðvum slökkviliðs Borgarfjarðar auk þess sem aðstoð barst frá slökkviliði Akraness og Hvalfjarðarsveitar.
„Ein manneskja var í húsinu þegar eldurinn kom upp og lést hún í brunanum. Ekki er vitað um eldsupptök og er rannsókn á frumstigi. Lögreglan á Vesturlandi, ásamt tæknideild lögreglunnar á Höfuðborgarsvæðinu, rannsakar eldsupptök. Frekari upplýsingar verða ekki veittar að svo komnu máli,“ segir í skeyti lögreglu.
