Ingólfur Bruun, foreldri barns í Háteigsskóla, vandar borgaryfirvöldum ekki kveðjurnar í aðsendri grein í Fréttablaðinu í dag.
Ingólfur bendir á að hafnar séu framkvæmdir við Vatnsholt við Háteigsveg. Ekki alls fyrir löngu lögðu börn á svæðinu krossa á leiði útivistarsvæðis sem börn hafa nýtt áratugum saman. Nýsamþykkt deiliskipulag borgarinnar gerir ráð fyrir byggingaframkvæmdum á svæðinu og samkvæmt því verður ekki lengur hægt að leika sér á græna svæðinu eins og áður.
„Við þetta minnkar leiksvæði barna til muna í hverfinu. Þetta er miður. Öll höfum við verið börn og þau okkar sem komin eru yfir miðjan aldur muna vel hvað það var gaman að geta leikið sér á opnum svæðum í nágrenni skóla og heimilis,“ segir Ingólfur í grein sinni.
Hann segist dást að þrautseigju barnanna sem stóðu ofan á gamla vatnstankinum við Háteigsveg til að mótmæla fyrirhuguðum framkvæmdum. Hann minnir á að börn hafi sama rétt og fullorðin en rödd þeirra sé allt of oft hunsuð.
„Börn eru nefnilega oft skynugri og sjá betur lausnir en við sem fullorðin erum. Borgaryfirvöldum væri hollt að beygja sig oftar niður til jafns við börnin og spyrja þau hvað þeim finnst. Því miður er of seint að stöðva framkvæmdir við Vatnsholt en látum það verða okkur víti til varnaðar og hættum frekari landvinningum í þágu þéttingar byggðar í nágrenni Sjómannaskólans. Okkur vantar fleiri opin svæði, ekki færri.“
Ingólfur bendir einnig á að nú standi yfir framkvæmdir í nágrenni Háteigsskóla.
„Í stað þess að stækka helgunarsvæði skólans, bæði með hliðsjón af stærra leiksvæði og byggingu fyrir unglingadeild skólans, þá tóku borgaryfirvöld þá vondu ákvörðun að heimila íbúðabyggingar á umræddu svæði. Þetta er borgar- og skipulagsyfirvöldum til skammar. Umræddar ákvarðanir bera vott um skammsýni og þröngsýni svo furðu sætir. Hér er ekki verið að hugsa um betra mannlíf og hagsmuni barnanna okkar heldur einhverja aðra hagsmuni. Hverra hagsmunir skyldu það vera?“
