Einar Hafsteinn Árnason, formaður Fylkis bílstjórafélags og leigubílstjóri, fer nokkuð hörðum orðum um uppátæki Sambands ungra Sjálfstæðismanna frá því um helgina í samtali við Fréttablaðið í dag.
Greint var frá því um helgina þegar SUS-arar buðu almenningi upp á skutl í og úr miðbænum í því skyni að vekja athygli á bágbornu ástandi á leigubílamarkaðnum hér á landi. Eins og landsmenn vita hefur verið erfitt að fá leigubíl í miðbæ Reykjavíkur um helgar.'
Sjá einnig: Svona varð íslenski leigubílamarkaðurinn eins og hann er í dag
„Við kannski bjóðumst til þess að leysa Sjálfstæðismenn af á þinginu út af því að það kostar of mikið fyrir okkur að borga þeim laun og þeir afgreiða ekki nógu mikið. Það væri svipað skilurðu. Ég gæti gengið inn á Alþingi og leyst fjármálaráðherra af, því mér finnst hann ekki gera hlutina rétt. Þetta er svo vitlaust,“ segir Einar í samtali við Fréttablaðið.
„Það er ekkert mál að gera þetta ef þú þarft ekki að sinna öllum kostnaðinum, eins og hjá skutlurunum, eða SUS. Það er enginn kostnaður þar að baki, þeir eru bara á fólksbílnum sínum að skutla, með venjulegar tryggingar en ekki þessar svokölluðu leigubílatryggingar sem eru upp í 7-800 þúsund kall á ári. Mamma og pabbi borguðu sennilega eldsneytið þarna um nóttina, sem er 320 krónur líterinn í dag. Þannig þetta er ekki svona einfalt.“
Viðtal Fréttablaðsins við Einar í heild sinni.
