Héraðsdómur Reykjavíkur hefur dæmt karlmann í 60 daga óskilorðsbundið fangelsi og til að greiða rúmar 320 þúsund krónur eftir að leigubílaferð í október síðastliðnum endaði með ósköpum.
Í ákæru kemur fram að maðurinn hafi laugardaginn 12. október síðastliðinn, blekkt leigubílstjóra til að aka sér frá Laugavegi að ótilgreindum stað í Reykjavík án þess að greiða fyrir farið. Greiddi hann aðeins hluta fargjaldsins en í kjölfarið reif hann áklæði af framsæti leigubifreiðarinnar með þeim afleiðingum að skemmdir urðu á áklæðinu.
Gerð var krafa um að maðurinn myndi greiða skaðabætur, samtals rúmar 320 þúsund krónur.
Í niðurstöðu dómsins kemur fram að ákærði hafi ekki sótt þingfestingu málsins og ekki boðað forföll. Var málið því dæmt að honum fjarstöddum. Maðurinn, sem er fæddur árið 1984, á að baki nokkurn sakaferil en frá því hann varð 18 ára hefur hann hlotið 10 refsidóma.
Með hliðsjón af þessu þótti hæfileg refsing 60 daga fangelsi en auk þess var honum gert að greiða 321.150 krónur í skaðabætur sem væntanlega má rekja til áklæðisins sem hann reif af.
