„Við upplifum þetta sem algeran hrottaskap í viðskiptum,“ segir Þórhallur Viðarsson, einn eigenda skemmtistaðarins B5 í Bankastræti, í samtali við Morgunblaðið í dag.
B5 leigir staðinn af fasteignafélaginu Eik og er Þórhallur afar óhress með tíðar hækkanir á leiguverði undanfarin misseri, meðal annars nýlega þegar fasteignafélagið vildi ekki endurskoða áður samþykktar hækkanir þegar samkomubann var sett á og staðnum lokað.
Í Morgunblaðinu kemur fram að leigan hafi hækkað um hálfa milljón króna þann 1. apríl síðastliðinn. Segir Þórhallur að ef forsvarsmenn staðarins myndu ekki fallast á hækkanirnar yrði aðeins hægt að hafa staðinn opinn til klukkan eitt eftir miðnætti.
Þórhallur segir að forsvarsmenn staðarins hafi ekki átt annarra kosta völ en að samþykkja hækkanirnar. „Spurningin sem við höfum staðið frammi fyrir er hvort við viljum setja félagið í þrot eða borga það sem þeir fara fram á. Fyrir mér er þetta ekkert annað en ofbeldi,“ segir hann.
Garðar Hannes Friðjónsson, forstjóri Eikar, segir við Morgunblaðið að brugðist hafi verið við vandræðum leigutaka vegna COVID-19 faraldursins og þeim sem þurftu veitt aðstoð.
