Óprúttnir aðilar eru að senda tölvupósta í nafni Póstsins í þeim tilgangi að komast yfir kortaupplýsingar fólks. Pósturinn varar eindregið við því að smella á hlekki sem fylgja þessum póstum og undir engum kringumstæðum ætti að gefa upp kortaupplýsingar eða aðrar persónulegar upplýsingar.
Þetta kemur fram í tilkynningu sem Pósturinn sendi frá sér. Bent er á að þeir viðskiptavinir sem eiga von á sendingum geti eftir sem áður fylgst með ferðum þeirra á heimasíðu Póstsins, posturinn.is.
„Við viljum að það sé alveg skýrt að þessir póstar koma ekki frá okkur, það er mjög leiðinlegt að horfa upp á óprúttna aðila nota nafn Póstsins til að svíkja fólk. Við hvetjum alla til að huga vel að því hvort þeir eigi von á sendingum og minnum á að ef greiða á af sendingu á netinu hjá okkur þarf alltaf að skrá sig inn á örugga síðu á minnpostur.is,“ segir Sesselía Birgisdóttir, framkvæmdastjóri þjónustu- og markaðssviðs, í tilkynningunni.
