Lárus Guðmundsson, veitingamaður á Rossopomodoro, er harðorður í garð borgaryfirvalda í grein sem hann skrifar í Morgunblaðið í dag. Lárus hefur rekið veitingastaðinn við Laugaveg 40 síðastliðin 14 ár en svo virðist sem hann sé búinn að fá sig fullsaddan af götulokunum í miðborginni.
„Núna í miðjum heimsfaraldri kórónuveiru þrengir að mörgum rekstri, sér í lagi í hvers kyns þjónustustarfsemi. Ég finn það á eigin skinni en ég hef undanfarin 14 ár rekið veitingastaðinn Rossopomodoro á Laugavegi 40 og allan tímann á sömu kennitölu. Ég hef alltaf borgað mína skatta og skyldur skilvíslega og stöðugildi eru að jafnaði tólf til fimmtán. Við sem rekum starfsemi í miðbænum höfum þó þurft að eiga við annars konar faraldur undanfarin átta ár, faraldur sem birtist í lokunum gatna og sífellt meiri höftum á aðgengi að miðbænum.“
Fólkið fælt frá
Lárus segir að þetta hafi gert það að verkum að Íslendingar sæki í miklu minna mæli í bæinn en áður.
„Þeir koma jafnan á sínum bíl en götulokanir hafa fælt stóran hluta þeirra frá því að koma í bæinn. Þannig hefur fólk kerfisbundið verið vanið á að fara annað að sækja verslun og þjónustu.“
Lárus kveðst þekkja vel til í miðbænum eftir 14 ára starf þar og þá segist hann vera í sambandi við fjölmarga vini sína á svæðinu, veitingamenn og kaupmenn. Hann fullyrðir að enginn þeirra sé hlynntur umræddum götulokunum og segir að borgaryfirvöldum sé fullkunnugt um andstöðu meirihluta rekstraraðila.
Ítrekað sýnd lítilsvirðing
„Hinir háu herrar í ráðhúsinu hafa þó kosið að skella skollaeyrum við tilmælum okkar. Ekkert samráð er við okkur haft og okkur ítrekað sýnd lítilsvirðing af þeirra hálfu. Við höfum mátt þola hroka og yfirgang. En það eru ekki bara lokanir sem spilla fyrir viðskiptum heldur tóku borgaryfirvöld upp á því að snúa við akstursstefnu á Laugavegi milli Klapparstígs og Frakkastígs. Sú aðgerð gerir ekkert annað en ergja þá sem eiga erindi í bæinn og má jafna því við að götunni sé lokað.“
Lárus segir að það sé hægt að snúa vörn í sókn og það sé mikilvægt nú sem aldrei fyrr þegar farsóttin er í rénun. Hann leggur til að gripið verði til nokkurra aðgerða ekki seinna en strax.
„Afnema allar götulokanir á Laugavegi, Skólavörðustíg og Bankastræti. Snúa aftur við akstursstefnunni á Laugavegi milli Klapparstígs og Frakkastígs. Bjóða frítt í bílastæðahúsin í nágrenninu fyrstu þrjár klukkustundirnar. Hætta að innheimta bílastæðagjöld og taka upp framrúðuskífur þess í stað þannig að frítt verði að leggja, til dæmis frá 90 mínútum og upp í 180 mínútur eftir fjarlægð frá Laugavegi. Borgin taki strax upp samráð við Miðbæjarfélagið í Reykjavík enda eru þar innandyra flest elstu og þekktustu fyrirtækin á svæðinu sem gera það spennandi og eftirsóknarvert að koma í bæinn.“
Lárus segir að lokum að nú sé komið að ögurstundu fyrir marga rekstraraðila og bregðast þurfi strax við ef ekki á illa að fara. „Meira en nóg er komið af götulokunum og öðrum höftum á aðgengi í bæinn!“
