Lára leitaði konu sem hafði mikil á­hrif á hana – Komst að því síðar að hún væri látin

„Á lífs­leiðinni verður á vegi okkar ó­teljandi fólk en það er fegurstu sálirnar sem aldrei hverfa úr minningunni,“ segir fjöl­miðla­konan Lára Ómars­dóttir.

Lára leitaði til vina og vanda­manna á Face­book í vikunni til að hafa upp á konu sem hafði mikil á­hrif á hana fyrir margt löngu.

„Þannig er mál með vexti að árið 1995 þurfti ég að undir­gangast nokkrar að­gerðir á Land­spítala á nokkurra mánaða tíma­bili og fóru svæfingarnar þannig í mig að ég missti að hluta til minnið á þessu tíma­bili. Þess vegna man ég ó­mögu­lega hvað konan heitir og er svona að vona að ein­hver hér kannist við hana,“ sagði Lára í færslu sinni og gaf á­kveðnar lýsingar á konunni.

Lára sagði að konan hefði alveg bjargað spítala­vist hennar.

„Fyrst eftir að­gerðina, þegar ég var enn með drenið og allt draslið og komst ekki neitt, sótti hún mig og ók með mig í sjúkra­rúminu um allan spítalann. Þegar ég svo gat staulast á fætur hvatti hún mig á­fram og lét mig ganga um allt þegar mig langaði mest að væla bara og vor­kenna mér.

Hún var svo já­kvæð og við­horf hennar til lífsins hafði mikil á­hrif á mig. Hún kvartaði aldrei undan veikindum sínum sem voru svo miklu meiri en mín heldur var þakk­lát fyrir hvern dag. Ég man að hana langaði mikið að fara til út­landa með börnunum sínum og var að skipu­leggja slíka ferð en til þess að hún gæti það þyrfti ein­hver að fara með henni því hún til dæmis gat ekki nærst al­menni­lega.“

Sagði Lára að hana langaði mikið til að hitta konuna og þakka henni fyrir allt sem hún gaf henni.

Lára birti svo aðra færslu í gær þar sem hún greindi frá því að upp­lýsingar um konuna hefðu borist, en því miður hefði konan, sem hét Ólöf Einarsdóttir, látist árið 2015.

„Ólöf var mér al­ger stoð og stytta inni á spítalanum. Hún var alltaf kát og glöð og horfði já­kvæðum augum til fram­tíðarinnar. Æðru­leysi hennar var ein­stakt og þarna lærði ég að meta hvern dag og vera þakk­lát fyrir allt það góða sem lífið hefur upp á að bjóða,“ segir Lára sem þakkaði vinum sínum á Face­book.

„Það er ykkur, vinir mínir kærir, að þakka að ég hef nú haft sam­band við börnin hennar Ólafar og ætlum við að hittast í fjar­spjall fljót­lega til að rifja upp góðar minningar um afar mæta konu,“ segir hún í færslunni sem hún endar á þessum orðum:

„Ég hlakka til að hitta börnin hennar. Þau mega vita sem var að móðir þeirra var gull af konu og snart marga á lífsleið sinni, þar á meðal mig.“