Fjölmiðlakonan Lára Ómarsdóttir virðist hafa fengið ríflega launahækkun þegar hún var ráðin samskiptastjóri Aztiq Fund, fjárfestingafélags Róberts Wessman og Árna Harðarsonar.
Samkvæmt álagningarskrá ríkisskattstjóra sem lögð var fram í dag námu mánaðartekjur Láru rúmum tveimur milljónum króna í fyrra, eða 2.119.610 til að gæta nákvæmni.
Tilkynnt var um ráðninguna í febrúar 2021 en í kveðjupósti Láru til samstarfsmanna sinna á RÚV, sem fréttavefur Vísis fjallaði um á sínum tíma, sagðist hún hafa fengið boð um óvænt starf sem væri of spennandi til að hafna. Borið hefur á því á undanförnum árum að reyndir fjölmiðlamenn söðli um og fari í betur launuð störf, til dæmis sem samskiptastjórar eða upplýsingafulltrúar.
Er það sjaldgæft að laun óbreyttra blaðamanna eða millistjórnenda á fjölmiðlum fari upp fyrir eina milljón króna.
Lára var einn reyndasti fréttamaður RÚV en hún hafði verið í tólf ár hjá stofnuninni, bæði í fréttum og í sjónvarpsþættinum Kveik svo dæmi séu nefnd. Aztiq er stórt fjárfestingafélag og eru stærstu eignir hans hlutir í félögunum Alvogen og Alvotech.
