Richard Sumner, fyrrverandi fréttaritari BBC í málefnum konungsfjölskyldunnar, segir að yfirlýsing bresku konungshallarinnar um veikindi drottningarinnar, þar sem fram kom að læknar hefðu áhyggjur af heilsu hennar, sé til merkis um það að veikindin kunni að vera alvarleg.
„Þegar þú ert 96 ára býst enginn við því að þú sért með líkama eins og 25 ára manneskja. Vonandi er þetta eitthvað sem hún mun yfirstíga en ég held, miðað við yfirlýsinguna í morgun, að eitthvað alvarlegt sé mögulega á ferðinni,“ segir Richard.
Samkvæmt Richard er venjan hjá konungsfjölskyldunni sé að draga frekar úr yfirlýsingum en bæta í þegar veikindi eru annars vegar. Elísabet sé enn skýr í hugsun, mjög áhugasöm um málefni líðandi stundar en líkamleg heilsa ekki eins og best verður á kosið.
Fregnir af veikindum Elísabetar Bretlandsdrottningar eru fyrirferðarmiklar á breskum fréttamiðlum þessa stundina. Fjölmargir hafa sent drottningunni hlýja strauma eftir að greint var frá veikindum hennar en hún dvelur nú í Balmoral-kastala.
Liz Truss, nýr forsætisráðherra Bretlands, sagði að breska þjóðin væri áhyggjufull vegna fréttanna. „Hugur minn – og almennings í Bretlandi – er hjá drottningunni og fjölskyldu hennar þessa stundina.“
nánir aðstandendur Elísabetar Bretlandsdrottningar eru á leið til Balmoral kastala. Frá þessu er greint á vef BBC sem er með beina fréttalýsingu vegna tilkynningar um veikindi hennar.
Greint hefur verið frá því að Karl Bretaprins, Vilhjálmur Bretaprins og hertogahjónin Harry og Meghan séu á leið til kastalans. Áður hefur komið fram að læknar drottningarinnar séu áhyggjufullir yfir núverandi ástandi hennar.
Þá eru hin börnin hennar og systkini Karls, Anna, Andrés og Játvarður einnig á leið til drottningarinnar. Þá greinir BBC frá því að Katrín Middleton muni ekki fara til Balmoral kastala, heldur muni hún halda sig í Windsor kastala Í Lundúnum þar sem um er að ræða fyrsta skóladag barna þeirra.
Balmoral kastali er í Skotlandi og hefur verið aðsetur bresku konungsfjölskyldunnar í um 150 ár. Hann er í Aberdeenskíri.
