„Enn eina ferðina er Útlendingastofnun að brjóta gegn grundvallarmannréttindum og um leið að setja heilsu okkar og öryggi í hættu,“ segir í myndbandi sem birtist á Facebook-síðunni Refugees in Iceland í gær.
Í færslu sem birtist samhliða myndbandinu kemur fram að hluti þeirra sem dvalið hafa á Ásbrú að undanförnu hafi verið fluttir til Reykjavíkur. „Undir venjulegum kringumstæðum myndum við fagna því að búa í umhverfi þar sem einangrunin er ekki jafn mikil og áður,“ segir á Facebook-síðunni en því bætt við að yfir litlu sé að fagna.
„Aðstæðurnar hér í Reykjavík (Grensás) eru hræðilegar. Það eru að minnsta kosti tveir í nánast hverju einasta herbergi og í sumum herbergjum eru 4-5 einstaklingar. Það er ekki tekið með í reikninginn að sumir eru haldnir krónískum veikindum og eru í áhættuhópi þegar kemur að COVID-19.“
Í myndbandinu er veitt innsýn í hvernig staðan er í einu af herbergjum hússins. Um er að ræða lítið herbergi þar sem finna má koju, eldhúsvask og eldavél. Vaskurinn virðist ekki virka og þá er það gagnrýnt að íbúar herbergisins geti ekki gengið frá fötunum sínum, til dæmis inn í fataskáp, á stól eða í kommóðu. Þá er það gagnrýnt að engin loftræsting sé fyrir ofan eldavélina eins og oftast tíðkast.
Í færslunni sem fylgir með kemur fram að 32 einstaklingar þurfi að deila með sér tveimur hreinlætisaðstöðum.
„Þetta er klárt brot á mannréttindum og gengur gegn því sem íslensk lög gera ráð fyrir. Þar er kveðið á um að að hámarki tíu einstaklingar skuli vera um hverja hreinlætisaðstöðu. Það vita það allir að góð hreinlætisaðstaða er einn af veigamestu þáttunum þegar kemur að því að hindra útbreiðslu COVID-19. Þó að Útlendingastofnun myndi tryggja það að ekki fleiri en 10 væru um hverja aðstöðu mætti spyrja sig hvers vegna reglurnar eru ekki enn strangari á þessum tímum.“
Myndbandið má sjá hér að neðan.
