Hörður Ægisson, ritstjóri Markaðarins á Fréttablaðinu, er gestur hjá Jóni G. í kvöld. Þeir ræða eðlilega um vendingar síðustu daga hjá WOW og kerfisáhættuna sem fylgir því ef WOW lifir þessar hremmingar ekki af. Þegar tekið er tillit til skatta sem WOW og 1 þúsund starfsmenn þess greiða, áhættuna í hótelgeiranum og ferðaþjónustunni almennt, hátt í 100 milljarða króna gjaldeyristekjur sem tengjast beint og óbeint rekstri félagsins, er eðlilegt að spyrja hvort fjármálakerfið sé að fórna meiri hagsmunum fyrir minni með því að koma ekki með nýtt fé inn í félagið og reyna að bjarga því. En er þá verið að henda góðu fé á eftir slæmu?, gætu margir spurt.
Kröfuhafar eru núna tilbúnir til að breyta 15 milljarða kröfu í 49% hlut í félaginu sem metinn er á 5 milljarða en það er einmitt sú fjárhæð sem til stendur að bjóða nýjum fjárfestum 51% hlutinn á. Vissulega er um stökkbreytingu að ræða varðandi efnahagsreikninginn en eftir stendur rekstrarreikningur þar sem félagið hefur augsýnilega verið að selja farmiða á of lágu verði í tilraun sinni til að elta Icelandair í samkeppninni á fjölda áfangastaða.
WOW hefur frá í desember á síðasta ári þegar helmingað framboð flugsæta sem það býður upp á og fækkað vélum úr tæpum tuttugu í níu. Þannig að kerfisáhættan hefur minnkað frá því félagið flaug í hæstu hæðum.
Stóra spurningin er núna hverjir eða hver sé tilbúinn til að kaupa 51% hlutinn. Þetta er ennþá mikill lífróður þótt kröfuhafar séu tilbúnir til að afskrifa 10 milljarða af 15 milljörðum og stuðla þannig að áframhaldandi rekstri félagsins og fá þannig huganlega 5 milljarða þegar fram í sækir í staðinn fyrir ekki neitt með gjaldþroti félagsins.
