„Ég í minni sparsemi er yfirleitt með saltaða rollu í tunnu og ég bara upp úr henni,“ segir hinn 22 ára gamli Kristófer Orri Hlynsson í viðtali í Fréttablaðinu í dag.
Óhætt er að segja að um athyglisvert viðtal sé að ræða því þar kemur fram að Kristófer hafi fyrir tæpum tveimur árum flutt einn á eyðibýlið Syðsta-Mó í Flókadal í Fljótum til að gerast bóndi. Þegar Kristófer flutti á Syðsta-Mó átti hann tólf ær en í ár var hann komin upp í 350 ær.
Kristófer segir að búskapurinn sé ekki auðveldur og viðurkennir hann að þetta hafi verið erfiðara en hann átti von á.
„Ég vissi svo sem alveg að það væri lítið upp úr þessu að hafa og að það yrði enginn ríkur af því að vera bóndi. Tekjurnar komu mér því ekki í opna skjöldu heldur frekar kostnaðurinn við búreksturinn. Það eru alls konar lúmsk útgjöld sem ég hafði vanmetið. Já, þetta er verra en ég hélt, en ég gefst ekkert upp.“
Bærinn hafði verið í eyði í sex ár þegar Kristófer flutti þangað en íbúðarhúsið var í fínu lagi. „Það voru eldri hjón sem bjuggu hérna en þau höfðu brugðið búi mörgum árum fyrr,“ segir hann.
Í viðtalinu kemur fram að Kristófer hafi kynnst ástinni í lífi sínu, Söru Kristínu Sandholt, eftir að hann flutti á bæinn. „Ég kannaðist aðeins við hana og fékk hana til að hjálpa mér við sauðburðinn. Svo kviknaði einhver neisti og hún bara fór eiginlega ekkert,“ segir hann en sjálf er Sara búsett á Akureyri enda litla vinnu að hafa í sveitinni.
Kristófer horfir ekki á sjónvarp, vinnur bara og fer síðan að sofa. Þegar hann er einsamall er matseðillinn ekki mjög fjölbreyttur. „Ég í minni sparsemi er yfirleitt með saltaða rollu í tunnu og ég bara upp úr henni. Svo finnst mér gott að eiga heimagerð bjúgu í frysti,“ segir hann.
Þetta athyglisverða viðtal má lesa í heild sinni hér.
