Kristján Berg, betur þekktur sem Fiskikóngurinn, greinir frá því á Facebook að ein elsta fiskverslun landsins lokar á Höfaðbakka á föstudaginn.
„Fiskverslun okkar að Höfðabakka 1.Lokar dyrum sínum.Síðasti dagur verslunarinnar verður föstudagurinn 27 janúar.
Ástæða lokunar eru eftirfarandi:
-hátt fiskverð á fiskmörkuðum, ástæða er að stórútgerðir eru að gleypa allan fisk og lítið af fiski berst inná fiskmarkaði, þannig að fiskverð helst hátt.
-erfitt að manna allar stöður frá 7:00 til 18:30 alla virka daga.
-fólk verslar minni fisk, sem er ótrúlegt miðað við gæði og heilbrigði vörunnar
-hækkun alls og allra þátta rekstrar sem gera svona litla einingu órekstrarhæfa.
-öll aðföng hafa hækkað, hvað sem það er. Umbúðir, flutningur, olía, hveiti, hanskar, klósettpappír....BARA ALLT,“ skrifar Kristján.
„Það er sorglegt hvernig svona verslun sem hefur verið starfrækt frá árinu 1994, þurfi að leggja upp laupanna og loka. Þetta er bara fyrsta fiskverslunin sem lokar. Það eiga fleiri fiskverslanir eftir að loka. Það er klárt mál. Enda orðinn lítill grundvöllur fyrir rekstri fiskverslunar á Íslandi í dag. Pizzu og cocapuffs kynslóðin er að taka yfir og borðar minni fisk.
„Húsmæður landsins eru flestar útivinnandi, mötuneyti landsins bjóða orðið ekki lengur uppá fisk, ekki nema max 1x í viku og alltaf sama í matinn hjá flestum þeirra. Sem leiðir til minnkandi fiskneyslu á heimilum landsins. Unga kynslóðin kann ekki að borða t.d. hrogn og lifur, léttsaltaða ýsu, gellur og kinnar og svo mætti lengi telja.Unga kynslóðin er ekki lengur alin upp við þessa matarmenningu, sem er svo sárt að horfa uppá. Við erum því miður að gleyma uppruna okkar, á hverju við lifðum af, hvernig menning okkar varð til. Þetta er sorglegt ástand, að mínu mati. Það eru bara breyttir tímar og ekki lengur farið heim í hádegismat þar sem mamma var klár með mat,“ skrifar Kristján.
„Fiskur var oft á borðum landsmanna, vegna þess að fólk hafði efni á að kaupa fisk. Fiskur var ódýr í gamla daga. Fiskur ætti ekki að kosta mikið hér á landi og ættu landsmenn að njóta niðurgreiðslu á fiski jafnt sem gert er t.d. með lambakjötið okkar. C.a. 7 milljarða niðurgreiðsla ár hvert fer í að greiða niður lambakjöt sem er að mestu leyti flutt úr landi.
-7 milljarðar er meiri upphæð en allir túristar sem koma hingað til lands, allir landsmenn, öll fyrirtæki, leikskólar, sjúkrastofnanir, veitingastaðir og öll fangelsi landsins greiða fyrir fiskmeti sem selt er hér innanlands. Spáið í þessu!!! Þetta er bilun,“ segir Kristján.
Hann biður fólk að ímynda sé ef hægt væri að fá allan þennan fisk frítt fyrir alla landsmenn og túrista og sleppa niðurgreiðslunni á lambakjöti í staðinn.
„Hvort myndir þú velja? Mitt svar: Fiskur. Takk. Það er ósanngjarnt gefið í landinu. Því miður, þegar kemur að niðurgreiðslu matvæla. Alþingi stjórnar þessu. Ekki Fiskikóngurinn.
Þið getið kennt Alþingi og stjórnmálamönnum um stöðu þessara mála í dag,“ skrifar Kristján.
Hann segir að framtíð Fiskikóngsins sé þó ekki alveg úti.
„Við ætlum að reka eina stóra glæsilega fiskverslun, á Sogavegi 3 í framtíðinni, þar sem við bjóðum uppá landsins mesta úrval af fiski og fiskréttum og öllu þessu gamla og góða. Hnoðmör, siginn fiskur, skata, gellur og kinnar, svo mætti lengi telja. Allt starfsfólk Höfðabakka, hefur samþykkt að koma og vinna með okkur á Sogavegi 3. Við vonumst til þess að sjá ykkur sem flest á Sogavegi 3 og þökkum ykkur kærlega fyrir viðskiptin á Höfðabakka síðast liðin 29 ár. Allur fiskur, td humar, allar vörur, allt í verslun verður selt með 20% afslætti næstu 2 daga á Höfðabakka 1,“ skrifar hann að lokum.
