Kristinn gagn­rýnir grímu­skyldu að nýju: „Ís­land ER sótt­kví“

Kristinn Hrafns­son, blaða­maður og rit­stjóri Wiki­leaks, gagn­rýnir enn á ný á­kvörðun Þór­ólfs Guðna­sonar, sótt­varna­læknis, um að fram­lengja al­menna grímnu­skyldu hér á landi, í nýrri Face­book færslu.

Þar birtir Kristinn mynd af út­breiðslu smita hér á landi af vef al­manna­varna. „Hér er mynd af co­vid sögu Ís­lands sem spannar ár. Hún sýnir tvær bylgjur (já, nei ég nenni ekki að tala um þrár – eða fjórar). Fyrri bygjan var sigruð með sam­hæfðum að­gerðum án al­mennrar skyldu til grímu­notkunar. Sú seinni kraumaði lengi en tók síðan sitt skrið, steig og hneig á meðan grímu­skylda var við lýði (mis hörð).“

Sjá einnig: Búnir að fá nóg: „Af hverju þarf að telja inn í verslanir og af hverju er grímu­­skylda?“

Kristinn segir að ætla megi að gríman hafi ekki ráðið úr­slitum í fram­þróun bylgju tvö miðað við árangur í bylgju eitt. „Þetta er svona al­þýðu­vísinda­nálgun í anda hinnar frægu spurningar. „Um hvað reiddust guðin þá, er hér brann hraunið, er nú stöndum vér á?". Tekið skal fram að Snorri goði var hvorki út­lærður jarð­vísinda­maður né guð­færðingur úr virtum há­skóla og hefði verið út­hrópaður á sam­fé­lags­miðlum sem bá­bylju­maður ef hann hefði frestað jarð­vist sinni um ríf­lega þúsund ár.“

Hann segir til­trú á á­hrifa­mætti grímunnar slíka að Þór­ólfur sjái enga á­stæðu til að af­létta notkunar­skyldu fyrr en líður að jólum, ef þá.

„Full­yrðir einnig að al­menningur sé afar sáttur við að bera þær. Þeir sem efast eru svo út­hrópaðir Trumpistar, Qa­non­sinnar, sam­særis­kenninga­smiðir, þjóð­ó­hollustu­gemlingar, fá­vitar eða jafn­vel Mið­flokks­menn. Ekki nokkur maður hefur fengið að viðra efa­semdir í fjöl­miðlum og yrði klipptur út ef það slíkt slysaðist út í beinni út­sendingu.
Það er lítið pláss fyrir jafn­vel hóf­samar og gagn­rýnar spurningar því í þessu sem öðru vex eyrað beint upp af ökklanum.“

Hann segir myndina sýna for­tíðina. „En staða mála er þessi: Það hefur ekki fundist virkt smit utan sótt­kvíar í mánuð. Verið er að bólu­setja og á að vera búið að klára alla full­orðnu þjóðina eftir 3-4 mánuði. Ís­land ER sótt­kví. Það er jafn­erfitt að komast inn í landið og fyrir gamlan kommún­ista að fá dómara­stöðu.“

Sér­stakt ham­fara­blæti í sam­fé­laginu

Kristinn viður­kennir að allt geti gerst. Ekki sé úti­lokað að snar­bilaður íslam­isti steli flug­vél og klessi henni á Hall­gríms­kirkju eða að snjó­flóð falli á byggt ból í júlí. Hið full­komna öryggi felist í því að sitja með sæti­sólar spenntar, heima í stofu­sófa og spjalla við börnin inn í her­bergjum á Zoom.

„Í sam­fé­laginu kraumar eitt­hvað sér­stakt ham­fara­blæti sem sprettur fram í hvert skipti sem ein­hverjir leyfa sér að spyrja eðli­legra spurninga um smit­varnar­stefnu. Þetta er á­líka og dæmin fjöl­mörgu um fólkið með lítinn lífs­til­gang sem um­faðmar sorgina ef hún bankar uppá og neitar að sleppa. Þetta er fólkið sem myndi hrækja á ís­lendinginn sem dirfðist að segja „þetta er búið“ þegar lands­liðið er undir 0-3 og fimm mínútur eru til leiks­loka.
Þrátt fyrir allt hvet ég fólk til þess að gleyma ekki gagn­rýnni hugsun. Og um­fram allt: andið eðli­lega.“