Kristín Jóhannsdóttir, safnstjóri Eldheima í Vestmannaeyjum, segir í færslu í hópnum Bakland ferðaþjónustunnar á Facebook að það sé ekki óeðlilegt að ferðamannastaðir líkt og söfn séu uppbókuð. Adolf Ingi Erlingsson birti færslu í sama hóp í gær þar sem hann gagnrýndi tvö söfn Vestmannaeyja fyrir að loka fyrir almenningi, þar sem sjö manna hópur ferðamanna vildi ekki umgangast aðra.
„Það eina sem skyggði á var að tvö aðal söfnin voru lokuð almenningi vegna þess að einhver sjö manna hópur þykist vera svo merkilegur að hann getur ekki um gengist venjulegt fólk. Forstöðumenn beggja safnanna björguðu okkur samt þannig að við gátum skotist í gegn. Hvað finnst fólki um það að loka fyrir almenning til að þjónka einhverju VIP liði?“ skrifaði Alfreð.
„Ferðaþjónustufyrirtæki sem og einstaklingar sem vilja komast að á ákveðnum tíma og degi bóka fyrirfram. Þegar svo vill til að óbókaðir gestir koma þegar er uppbókað verða þeir að bíða þar til losnar. Á vinsælu safni einsog Eldheimum getur verið fullbókað á álagstímum á háannatímanum,“ skrifar Kristín.
Hún segir að til að óþægindi yrðu sem minnst fyrir Alfreð og fleiri gesti sem ekki áttu bókaðan tíma í safninu hafi verið hringt í þá um leið og pláss losnaði. Þetta hafi verið gert þegar laust pláss var eftir hálftíma á safninu, með sérstökum kjörum.
„Það kemur svo málinu nákvæmlega ekkert við fyrir hvern var fullbókað !“
