Kristín Johansen, móðir níu ára stúlku í Flataskóla í Garðabæ, er allt annað en sátt við þá ákvörðun skólans að sýna börnum mynd sem fjallar um sögu og mikilvægi bólusetninga fyrir börn.
Kristín vekur máls á þessu í aðsendri greinn í Morgunblaðinu í dag og vísar í tölvupóst sem henni barst frá kennara skólans um þátttöku hans í verkefni með UNICEF. Að sögn Kristínar er um að ræða fjáröflun fyrir UNICEF og fræðslu um réttindi barna samkvæmt Barnasáttmálanum.
„Svo er talað um „mynd sem þau eiga að sjá sem fjallar um sögu og mikilvægi bólusetninga fyrir börn og hvers vegna það er mikilvægt að tryggja að öll börn fái slíka vörn gegn lífshættulegum sjúkdómum“,“ segir Kristín sem kveðst vilja gagnrýna þetta.
„Ég set spurningarmerki við gagnsemi þess að sýna níu ára krökkum upplýsingamyndbönd um bólusetningar þar sem þau hafa ekki forsendur til að kynna sér málið frá öðrum hliðum. Það eru vaxandi áhyggjur um tilgang og gagnsemi bólusetninga og ekki síst í dag þegar við horfum upp á að gripið hefur verið til þess ráðs að reyna mRNA-líftæknimeðferð fyrir sem flesta við veiru sem vegur ekki fleiri en flensa hefur gert í gegnum tíðina. Jafnvel hefur maður heyrt að standi til að sprauta börn „fyrir“ þessum vírus sem snertir þau ekki og telja verður í besta falli vafasamt. Er tímasetningin á þessu myndbandi kannski ekki tilviljun?,“ spyr Kristín í grein sinni.
Hún segir það vera í höndum foreldra og aðstandenda að taka ákvarðanir fyrir hönd ólögráða einstaklinga um mál sem tengjast heilsu þeirra, bólusetningar þar á meðal.
„Það er hætta á að einhliða umfjöllun eins og sú sem hér er á dagskrá muni kalla fram einhliða umræðu og viðbrögð hjá börnum sem ekki hafa tækifæri né aðgang að fleiri hliðum á þessum mikilvægu og alvarlegu málum sem bólusetningar eru,“ segir Kristín sem veltir upp nokkrum spurningum.
„Hafið þið skoðað hvort um hræðsluáróður sé að ræða í myndbandinu? Er talað þar um að börn geti dáið ef þau fá ekki bólusetningu? Hver er tilgangurinn með því?“
Kristín segist frábiðja sér því að dóttur hennar verði sagt, beint eða óbeint, að hún geti dáið ef hún fái ekki bólusetningar.
„Ég kæri mig ekki um að greypa það viðhorf í hana. Eitt er að hvetja börn til hreyfingar og útivistar og vekja þau til meðvitundar um réttindi sín sem einstaklinga, en allt annað að fjalla einhliða um nauðsyn bóluefna í því samhengi, það myndi teljast til áróðurs fremur en fræðslu. Þar er um að ræða flókinn málaflokk sem alls ekki allir eru á eitt sáttir um. Ég hvet ykkur því til að endurskoða þá ákvörðun að leyfa sýningu slíks einhliða myndbands fyrir börn sem hafa ekki nægan skilning á málefninu.“
