Ef ekki næst samkomulag um að áfangaheimili í Kópavogi fái frest til úrbóta vegna kröfu slökkviliðs um útburð, lenda 25 húsnæðislausir menn á götunni, langflestir alkóhólistar, um næstu mánaðamót. Þetta kemur fram ífrétt Fréttablaðsins.
Í þessum hópi eru vistmenn sem hafa fyrirgert rétti sínum hjá félagsbústöðum og hafa engar bjargir til að útvega sér húsnæði en slökkviliðið krefst útburðar á grunni þess að eldvörnum sé ábótavant.
Arnar Hjálmtýsson, sem rekur heimilið undir merkjum Betra lífs, segir að allt hafi verið gert til að bregðast við kröfum slökkviliðsins. Eigi að síður kunni svo að fara að fullum úrbótum verði ekki náð fyrir næstu mánaðamót.
„Það yrði gríðarlegt högg og voði fyrir mennina ef þeir færu á götuna,“ segir Arnar. Hann segir að áfangaheimilið sé bráðabirgðalausn. Til standi að flytja starfsemina yfir í annað húsnæði.
Fram kom á Fréttavaktinni á Hringbraut í gær að þrír skjólstæðingar Arnars hafa látist á þremur árum meðan þeir biðu eftir að komast í meðferð.„Síðan við opnuðum hafa tólf einstaklingar látist, aðallega ungt fólk, eftir að þeir fóru frá okkur. Bakkus er mjög grimmur,“ segir Arnar.
Mál vegna brunavarna áfangaheimilis við Fannborg í Kópavogi hefur verið í gangi í tæpt ár en ekki hefur verið brugðist við athugasemdum frá slökkviliðinu og byggingarfulltrúa Kópavogs.
Þetta segir Sigríður Björg Tómasdóttir, almannatengill Kópavogsbæjar í samtali við Fréttablaðið.
Sigríður segir slökkviliðið hafa gert úttekt á húsnæðinu í ágúst og í kjölfar þess hafi borist beiðni til byggingarfulltrúa um að húsnæðið yrði rýmt. Gefinn var rúmur frestur til úrbóta en athugasemdum ekki sinnt. Eigandi húsnæðis er Árkór en Betra líf er með húsið á leigu.
„Brunavarnir í húsnæðinu eru óásættanlegar og þar sem húsnæðið er skrifstofuhúsnæði er búseta í því óheimil. Ekki er hægt að gefa undanþágu á brunavörnum. Þarna búa einstaklingar við óviðunandi brunavarnir,“ segir Sigríður Björg.
