Kona að nafni Kinga Stanelé, sem býr í Reykjanesbæ, hefur stefnt ríkinu og krafist einnar milljónar króna í miskabætur fyrir að hafa með ólöglegum hætti verið neydd til að dveljast í sóttvarnarhúsi við komu til Íslands frá Póllandi. Þetta kemur fram í fréttDV.
Bjarni Benediktsson, fjármála- og efnahagsráðherra, er skráður í fyrirsvari fyrir íslenska ríkið í málinu en aðalmeðferð fer fram í Héraðsdómi Reykjavíkur á morgun.
Í frétt DV segir að Kinga kom til landsins frá Póllandi 2. apríl 2021. Við komuna til landsins var hann gert að sæta sóttkví á Fosshóteli í Þórunnartúni 1 á grundvelli þágildandi sóttvarnareglugerðar. Kinga mótmælti þessu og sagðist tilbúin að vera sóttkví heima hjá sér. Ekki var tekið tillit til mótmæla hennar og hún flutt með rútu frá Keflavíkurflugvelli til Reykjavíkur, að Þórunnartúni.
„Tveimur dögum síðar krafðist lögmaður Kinga þess að ákvörðunin um að hún ætti að dveljast í sóttvarnarhúsi yrði borin undir héraðsdóm. Fyrir héraðsdómi voru felldar úr gildi stjórnvaldsákvarðanir þess efnis að farþegar til landsins yrðu að dveljast á sóttvarnahóteli því ekki þótti vera lagastoð fyrir þessari grein í reglugerðinni.“
Konan telur að brotið hafi verið á ákvæði stjórnarskrárinnar um enginn verði sviptur frelsi nema með lögum og að hafi maður verið sviptur frelsi að ósekju skuli hann eiga rétt til skaðabóta.
Samkvæmt stefnu málsins sem DV hefur undir höndum byggir hún kröfu sína um miskabætur einnig á því að hún hafi verið reiðubúin að dveljast í heimasóttkví og hafi gert ráðstafanir til þess. En þess í stað hafi hún verið vistuð á litlu hótelherbergi þar sem möguleikar hennar til að komast undir bert loft voru verulega takmarkaðir.
Einnig hafi henni verið meinað að fara í göngutúr sér til heilsubótar þrátt fyrir að það hafi staðið öðrum til boða.
Hún var vistuð í tvo sólarhringa og fer fram á eina milljón.
