Kolfinna Baldvinsdóttir, dóttir Jóns Baldvins Hannibalssonar, lýsir yfir mikilli óánægju með þá staðreynd að faðir hennar hafi verið ákærður fyrir að hafa áreitt Carmen Jóhannsdóttur kynferðislega.
Dómur féll í málinu í Héraðsdómi Reykjavíkur í morgun og fór það svo að Jón Baldvin var sýknaður. Hann var ákærður fyrir að hafa strokið Carmen utan klæða upp og niður eftir rassi. Sjálfur neitaði hann staðfastlega sök í málinu.
Kolfinna styður föður sinn af heilum hug og veltir því fyrir sér í færslu á Facebook hvers vegna faðir hennar var ákærður.
„Sýknaður, að að sjálfsögðu. Ákæruvaldið þarf að hugsa sinn gang. Það á ekki að draga mál inn í dómssal nema yfirgnæfandi líkur séu á sök (yfir 90%). Það lá fyrir frá upphafi að svo væri ekki. Saksóknari hefur eytt tíma okkar og peningum í vitleysu, sem hefði getað leitt til holskeflu af enn heimskulegri ákærum. Og þá er spurningin augljós: Hvers vegna dró saksóknari (Kolbrún Benediktsdóttir, Dröfn Kærnested) þetta fáránlega mál inn í dómssal? Hver var tilgangurinn? Frá mínum bæjardyrum séð er svarið augljóst.“
