Kolbrún Baldursdóttir, borgarfulltrúi Flokks fólksins, lagði fram athyglisverða tillögu á fundi borgarstjórnar síðastliðinn fimmtudag. Lagði hún til að kvikmyndin Síðasti bærinn í dalnum frá árinu 1950 yrði sýnd öllum grunnskólabörnum.
„Síðasti bærinn í dalnum er fyrsta leikna kvikmynd Óskars Gíslasonar. Hún var tekin upp á Tannastöðum í Ölfusi, í Kershelli og í Kjósinni og var frumsýnd árið 1950. Jórunn Viðar samdi tónlistina við myndina og var það fyrsta kvikmyndatónlist sem samin var á Íslandi við mynd í fullri lengd,“ segir í tillögu Kolbrúnar.
Hún bætti við að fyrir fáum árum hafi myndin verið endurgerð með stafrænum hætti og nú sé hún til þannig.
„Fulltrúi Flokks fólksins leggur það til að myndin verði sýnd grunnskólabörnum sem menningarinnlegg. Útfærslan og framkvæmd leggur fulltrúi Flokks fólksins til að sé í höndum menningar- og ferðamálaráðs Reykjavíkur og Kvikmyndasafnsins. Gera þarf samkomulag við Kvikmyndasafnið sem á sýningaréttinn. Þetta er merkileg mynd fyrir margar sakir og söguleg og ástæða er að kynna leikstjórann og höfund myndarinnar um leið og sýning myndarinnar yrði,“ segir í tillögunni.
Afgreiðslu tillögu Kolbrúnar var frestað en athyglisvert verður að sjá hvort hún nái fram að ganga.
