„Því verður ekki á móti mælt að Dagur B. Eggertsson hefur verið einkar farsæll borgarstjóri, enda er hann í grunninn velviljaður og réttsýnn maður. Þessi staðreynd gerir pólitískum andstæðingum hans vissulega erfitt fyrir, en þar sem þeir eru reknir áfram af heift finnst þeim uppgjöf ekki vera í boði. Þeir draga því ekki af sér í gagnrýni sem er nær ætíð áberandi vanstillt. Fyrir vikið eru hörðustu gagnrýnendur borgarstjórans stöðugt að skjóta sig í fótinn.“
Þannig hefst skoðanagrein Kolbrúnar Bergþórsdóttur í Fréttablaðinu í dag sem hefur yfirskriftina „Gegn Degi“. Þar skrifar Kolbrún um þá gagnrýni sem Dagur B. Eggertsson borgarstjóri má þola úr vissum kreðsum.
Dapurlegt að horfa upp á minnihlutann
Borgarstjóri er ekki hafin yfir gagnrýni að hennar sögn, „en þegar hún er stöðugt í formi skítkasts þá er ekki mögulegt að taka mark á henni.“ Kolbrún segir „dapurlegt“ að horfa upp á meðlimi minnihlutans í borgarstjórn „missa stjórn á sér í þráhyggjukenndum hugmyndum um að Dagur B. Eggertsson sé eyðileggingarmaskína og koma þurfi borgarbúum í öruggt skjól fyrir honum og hans vondu verkum.“
Að mati Kolbrúnar hefur enginn gengið jafn langt gegn Degi og Vigdís Hauksdóttir, borgarfulltrúi Miðflokksins, og Sjálfstæðismenn fylgja henni. Þeir séu æstir í að ná völdum í borginni en Kolbrún telur þau málefni sem flokkurinn hefur sett á oddinn að undanförnu „svo aum og innihaldslítil að nær útilokað er að draumurinn rætist.“
Kolbrún hrósar Hildi Björnsdóttur, borgarfulltrúa Sjálfstæðisflokksins, „sem stundar alvöru pólitík, hún er glögg og rökföst og ólíkt öðrum fulltrúum flokksins í borginni, er hún ekki stöðugt að búa til æsing og djöflast í borgarstjóra.“
Bolli gæti eytt peningunum betur
Þá næst beinir Kolbrún spjótum sínum að Bolla Kristinssyni kaupmanni.
„Talandi um að skapa æsing þá verður ekki komist hjá því að nefna innlegg Bolla Kristinssonar kaupmanns í baráttunni gegn borgarstjóra. Í langan tíma hefur Bolli kostað auglýsingar þar sem Dagur B. Eggertsson er sakaður um að vera að eyðileggja Laugaveg og Skólavörðustíg með götulokunum og hrekja þaðan veitingamenn og verslunareigendur. Hann er einnig sakaður um að hafa grætt lítil börn í hruninu, jafn langsótt og það nú hljómar,“ skrifar Kolbrún.
Hún segir kaupmanninum það að sjálfsögðu í sjálfsvald sett hvernig hann eyðir peningunum sínum. „En vissulega þætti manni betra að hann notaði þá til uppbyggingar á einhverjum sviðum, fremur en að þylja upp bull í tíma og ótíma og ala á óvild í garð borgarstjórans. Ekki verður horft fram hjá því að í áróðri sínum á Bolli stuðningsmenn sem hafa hátt. Eiginlega má segja að þeir spúi út úr sér hatri og heift í hvert sinn sem þeir heyra nafn borgarstjórans.“
Kolbrún segir það ekki fara fram hjá nokkrum sem gengur um Laugarveg og Skólavörðustíg hve blómlegt mannlíf þrífst þar, veitingastaðir iði af lífi og vegfarendur duglegir í að kynna sér úrval verslana á svæðinu.
„Á þessum stöðum er ekkert pláss fyrir bílaumferð, enda á hún alls ekki heima í miðborgum. Þeir sem sakna hennar eru illa haldnir af fortíðarþrá og eru að afneita nútímanum. Ef þeir endilega vilja geta þeir haldið áfram að berja höfðinu við steininn. Þeir hinir sömu ættu hins vegar snarlega að hætta ofsafengnum árásum sínum á Dag B. Eggertsson, enda eru þær þeim til lítils sóma,“ skrifar Kolbrún að lokum.
