Kolbrún Baldursdóttir, borgarfulltrúi Flokks fólksins, viðurkennir að hún hafi reiðst á fundi borgarráðs í gær. Tillögu hennar um að borgin kynnti sér betur starfshætti annarra þjóða í aðgerðum er varða rakaskemmdir var vísað frá á fundi ráðsins.
„Málið var greinilega eitthvað eldfimt því ekki fengust neinar skýringar á frávísuninni,“ segir Kolbrún í pistli á heimasíðu sinni.
„Tillagan var einföld og mild í sjálfu sér og sneri að því að hvetja umhverfisráð/svið að kynna sér starfshætti frá fleiri þjóðum svo sem Þjóðverjum eða Dönum en þessar þjóðir hafa náð góðum árangri í aðgerðum sem varða myglu- og rakaskemmdir í opinberum byggingum,“ segir Kolbrún sem kveðst hafa verið svekkt með frávísunina.
„Ég reiddist því ég hafði lagt vinnu í þessa tillögu og rætt við marga. Staðgengill formanns borgarráðs sem stýrði fundi fleygði þessari tillögu út eins og óhreinni tusku án skýringa nema bara af því að hún hafði valdið. Hvað á maður að halda þegar svona brútal vinnubrögð eru viðhöfð? Af hverju mátti þessi tillaga ekki fara í skoðun?“
Í tillögu Flokks fólksins sagði Kolbrún að loftgæðamál vegna rakaskemmda og annarra ástæðna væri stórt vandamál í sumum skólum og vinnustöðum Reykjavíkurborgar.
„Afleiðingar hafa verið skelfilegar fyrir marga. Víða í þeim löndum sem náð hafa hvað mestum árangri í aðgerðum sem varða rakaskemmdir t.d. í Þýskalandi eru notuð sérhæfð loftefnahreinsitæki til að bæta loftgæði tímabundið í skólastofum og öðrum rýmum sem eru loftmenguð og þegar verið er að vinna í menguðum rýmum við hlið rýma sem eru í notkun, til þess að bæta líðan nemenda og starfsfólks og gefa sérfræðingum meira svigrúm til að meta skemmdir og grípa til aðgerða.“
Kolbrún sagði í tillögunni að menguðu rýmin væru innsigluð og aðskilin frá öðrum rýmum og loftefnahreinsitækin notuð til aðstoðar. Lagði Kolbrún þa til að borgin myndi skoða þessar aðferðir með opnum hug.
Eftir að tillögunni var hafnað lagði Kolbrún fram bókun þar sem hún sagði: „Af einhverjum ástæðum virðist málið ofurviðkvæmt og eldfimt, svo eldfimt að ekki er einu sinni hægt að senda tillöguna til frekari skoðunar eða umsagnar hjá umhverfissviði? Fulltrúi Flokks fólksins á því ekki annara kosta völ en að leggja tillöguna fyrir borgarstjórn.“
