Kolbrún Baldursdóttir, borgarfulltrúi Flokks fólksins, hyggst leggja til við skóla- og velferðaryfirvöld að gefinn verði út leiðbeiningabæklingur til foreldra um hvernig best er að bregðast við þegar barn þeirra er gripið ótta sem rekja má til kórónuveirufaraldursins.
Þetta kemur fram í grein eftir Kolbrúnu sem birtist í Fréttablaðinu í dag. Yfirskrift greinarinnar er: Barnið mitt fékk COVID-19.
Kolbrún, sem er sálfræðingur að mennt, segir að mikið sé lagt á börn um þessar mundir.
„Börn, sem komin eru með aldur og þroska til, hafa vissulega fylgst með heimsfaraldrinum. Börnin hafa fram til þessa mörg hver haft áhyggjur af foreldrum sínum og öfum og ömmum. Hvort sem það er með tilkomu breska af brigðisins eða ekki, þá hefur veiran smokrað sér meira inn í barnahópa svo nú bætast við áhyggjur af eigin heilsu. Ætla má að enn meiri ugg hafi sett að börnum samfara því og þá ekki síst hjá þeim börnum sem hafa fengið COVID-19. Eitt er að heyra fréttir af vágestinum en annað að vera sjálfur í þeim sporum að hafa smitast,“ segir hún.
Illa brugðið
Kolbrún bendir á að hún hafi í gær lagt fram tillögu í borgarstjórn um sálfræðiaðstoð til starfsfólks og foreldra vegna COVID-19 smita í leik- og grunnskólum þar sem upp hefur komið COVID-19 hópsýking. Þá var lagt til að hugað yrði sérstaklega að þeim börnum sem smitast hafa af COVID-19 og þeim veitt sálfræðiaðstoð telji foreldrar þörf á. Nefnir Kolbrún að 426 börn í Reykjavík, 0-17 ára, hafi smitast af COVID-19 hér á landi.
„Þegar börnin eru annars vegar er öllum illa brugðið. Foreldrar barna sem smitast hafa af COVID-19 hafa án efa fundið fyrir miklum ótta. Sama má ætla að gerist hjá starfsfólki. Það er brýnt að foreldrum og starfsfólki standi til boða sálfræðiaðstoð til að vinna úr þessari erfiðu reynslu. Starfsfólk leik- og grunnskóla hafa verið undir miklu álagi frá upphafi faraldursins. Full ástæða er einnig til að huga að börnunum sem hafa fengið COVID-19. Mörg þeirra hafa hvorki aldur né þroska til að vinna úr áföllum af þessu tagi. Í viðtali við fagaðila gefst þeim tækifæri til að tjá upplifun sína, líðan og hugsanir, hvernig það var að vera í einangrun og koma síðan aftur í skólann, eða annað sem hvílir á þeim.“
Líðanin almennt farið versnandi
Kolbrún nefnir að almennt hafi líðan grunnskólabarna hér á landi farið versnandi, það eigi jafnt við fyrir faraldurinn og eftir að hann hófst. Þetta megi til dæmis sjá í könnunum sem birtar hafa verið hjá Landlæknisembættinu, Velferðarvaktinni og Umboðsmanni barna.
Kolbrún bendir svo á að 956 börn í Reykjavík séu á biðlista eftir sálfræðiaðstoð skólaþjónustu.
„Vegna heimsfaraldursins er ekki ósennilegt að einhver börn sofi verr, hafi minni matarlyst og geti jafnvel um fátt annað hugsað. Fulltrúi Flokks fólksins hefur, ásamt mörgum öðrum, áhyggjur af því að börn þrói með sér t.d. sýkla- og sjúkdómahræðslu og hræðslu við dauðann umfram það sem almennt gengur og gerist hjá börnum, því vissulega koma slík hræðslutímabil hjá hópi barna. Mörg börn eru orðin mjög meðvituð um sjálf sig og sína nánustu, passa sig að snerta helst ekki neitt og ef þau snerta eitthvað hafa þau áhyggjur af smiti.“
Af þessum ástæðum ætlar Kolbrún að leggja það til að gefinn verði út leiðbeiningabæklingur til foreldra, enda ekki sjálfgefið að allir foreldrar viti hvernig best er að bregðast við hræðslu barna sinna.
„Það er mikilvægt að huga að öllum þáttum í þessu sambandi þegar börn eru annars vegar. Ef ekki tekst að hjálpa þeim börnum sem þurfa að létta á kvíða og áhyggjum vegna COVID-19 er hætta á að hann grafi sig enn dýpra með alvarlegri afleiðingum.“
