Klukkunni verður ekki breytt: „Það má engu breyta á Ís­landi“

Skiptar skoðanir eru um þá á­kvörðun stjórn­valda að hafa klukkuna hér á landi ó­breytta. Þetta var til­kynnt á vef stjórnar­ráðsins í morgun en þar kemur fram að þessi á­kvörðun hafi verið tekin eftir ítar­lega skoðun á kostum og göllum þess að seinka henni um klukku­stund.

„Niður­staða ríkis­stjórnarinnar er að skoðun á því hvort færa ætti staðar­tíma nær sólar­tíma á Ís­landi hafi ekki leitt fram nægi­lega sterk rök til að rétt­læta þá miklu breytingu sem felst í því að seinka klukkunni um eina klukku­stund. Vegur þar þyngst að nei­kvæð á­hrif fækkunar birtu­stunda á vöku­tíma og skerðingar birtu­stunda í lok dags sem dregið gætu úr úti­vist og hreyfingu eru ekki nægi­lega vel þekkt, en birtu­stundum hefði fækkað um 13% á árs­grund­velli með breytingunni,“ segir á vef stjórnar­ráðsins.

Meðal þeirra sem hafa kallað eftir því að klukkunni verði seinkað er Svefn­rann­sóknar­fé­lagið. „Eins og staðan er í dag þá er klukk­an hálf­sex þegar við vökn­um klukk­an sjö á morgn­ana, miðað við sól­ar­­gang,“ sagði dr. Erna Sif Arn­ar­dótt­ir, for­maður Hins ís­­lenska svefn­rann­­sókn­ar­­fé­lags, í við­tali við Morgun­blaðið árið 2017.

Margir hafa tjáð sig á sam­fé­lags­miðlum um þessa nýjustu á­kvörðun stjórn­valda. Hall­grímur Helga­son rit­höfundur segir til dæmis: „Það má engu breyta á Ís­landi. Ekki einu sinni stilla klukkuna rétt.“ Gunnar Smári Egils­son, stofnandi Sósíal­ista­flokksins, segir að sitjandi ríkis­stjórn sé ríkis­stjórn stöðug­leika og Helga Vala Helga­dóttir, þing­maður Sam­fylkingarinnar, segir að þessi á­kvörðun hljóti að kalla á blaða­manna­fund, jafn­vel tvo.

„Mikil von­brigði,“ segir Erla Björns­dóttir í at­huga­semd á þræði Hall­gríms en hún er stofnandi og stjórnar­for­maður Betri svefns. Erla skrifaði auk þess bókina Svefnþar sem hún fjallaði meðal annars um svefnvandamál.

Jón Trausti Reynis­son, rit­stjóri Stundarinnar, segir að nú sé á­stæða til að fagna en hann skrifaði pistil um málið í febrúar 2019 sem vakti tals­verða at­hygli. „Í stuttu máli hefði breytingin þýtt að sól­setrið yrði klukkan 19.41 í staðinn fyrir 20.41. Nú er bara um að gera að nýta vel þennan klukku­tíma í birtu sem bjargaðist í dag og aðra daga,“ segir Jón Trausti í færslu á Face­book-síðu sinni.

Sjón­varps­maðurinn Egill Helga­son svarar því til í þræðinum að það sé samt dá­lítið skrýtið að búa í borg þar sem há­degi er klukkan hálf tvö. Egill segist þó aldrei hafa haft mikla skoðun á þessu. „En hugsaði þetta á sumar­sól­stöðum þar sem ég dáðist að því að enn var skjanna­bjart þótt komið væri mið­nætti sam­kvæmt klukkunni.“