Héraðsdómur Reykjaness hefur dæmt karlmann í fjögurra mánaða fangelsi, skilorðsbundið í þrjú ár, fyrir líkamsárás. Málið er allt hið óvenjulegasta en atvikið átti sér stað þann 24. september 2019.
Í ákæru kemur fram að maðurinn hafi ekið vörubifreið hægt upp að öðrum manni og klemmt hann á milli vörubifreiðar og sendibifreiðar. Afleiðingarnar voru þær að fórnarlambið hlaut mjúkpartaáverka á baki, mar á hendi og hné. Ekki var um alvarlega áverka að ræða en samkvæmt læknisvottorði var búist við því að maðurinn næði fullum bata.
„Háttsemi ákærða var hættuleg en hann klemmdi brotaþola á milli tveggja stórra bifreiða og hefði hæglega getað valdið brotaþola meira líkamstjóni en raunin varð,“ segir í dómi héraðsdóms.
Hvað nákvæmlega varð til þess að samskipti mannanna enduðu með þessum hætti liggur ekki ljóst fyrir samkvæmt dómi héraðsdóms. Samkvæmt skýrslu brotaþola hjá lögreglu varð eitthvað til þess að hinn ákærði byrjaði að öskra á brotaþola sem þá hafi séð svart og sturlast. Þeir hafi farið að rífast, brotaþoli stokkið út úr bifreið sinni og öskrað á ákærða. Síðan er haft eftir brotaþola: „Mér skilst að ég hafi hótað að drepa hann eða berja hann eða hvað sem það var.“
Fram kemur að hinn ákærði í málinu hafi hringt í Neyðarlínuna og óskað eftir lögreglu þar sem verið væri að ráðast á hann og hóta honum lífláti. Dómari hlustaði á upptökur af símtölum ákærða og brotaþola við Neyðarlínu og lögreglu og telur dómari að af þeim megi ráða að ákærða hafi staðið ógn af brotaþola. Hvað sem því líður var ökumaður vörubílsins sakfelldur og dæmdur til greiðslu miskabóta.
Fjögurra mánaða fangelsisdómurinn er sem fyrr segir skilorðsbundinn til þriggja ára. Auk þess var honum gert að greiða manninum sem klemmdist 400 þúsund krónur í skaðabætur, laun verjanda síns, 250 þúsund krónur, laun réttargæslumanns brotaþola, 124 þúsund krónur og annan sakarkostnað, 47 þúsund krónur.
