Tónlistarmaðurinn Kristján Kristjánsson, betur þekktur sem KK, er gestur Sigmars Guðmundssonar í þættinum Okkar á milli á RÚV í kvöld.
KK er einn af okkar ástsælustu tónlistarmönnum en í þættinum ræðir hann meðal annars um yngri ár sín þegar glíma við vímuefni setti svip á líf hans. Hann hefur verið edrú um langt skeið en í viðtalinu segist hann hafa verið svartsýnn á tilveruna án vímuefna. Hann hafi verið að flýja leiðindin og ekki liðið vel edrú.
„Brennivín og dóp var lausn á vanlíðan. Það var ofboðsleg vanlíðan í edrúmennskunni. Þegar maður fékk sér eitthvað opnaðist heimurinn og allt varð æðislegt,“ segir hann og bætir við að hann hafi aldið að það væri ekkert líf án þess að drekka og dópa. „En það er þveröfugt,“ segir hann og sér ekki eftir því að hafa látið staðar numið.
„Mig langar ekki að breyta lífi mínu úr þessu. Mig langar ekki að fá mér hugbreytandi efni. Ég er með önnur tæki til að ná góðum fíling.“
