Kjartan Jóhannsson, fyrrverandi stjórnarmálamaður og ráðherra, er látinn. Kjartan lést á heimili sínu á föstudag en hann fæddist þann 19. desember árið 1939.
Greint er frá andláti hans í Morgunblaðinu í dag.
Kjartan varð stúdent frá MR 1959, lauk prófi í byggingaverkfræði í Stokkhólmi árið 1963 áður en hann aflaði sér framhaldsmenntunar í rekstrarverkfræði. Hann lauk doktorsprófi frá Chicago árið 1969.
Hann var bæjarfulltrúi í Hafnarfirði 1974-1978, varaformaður Alþýðuflokksins 1974-1980 og formaður flokksins árin 1980-1984. Hann sat á þingi frá 1978-1989, var sjávarútvegsráðherra 1978-1979 og viðskiptaráðherra í minnihlutastjórn Alþýðuflokksins frá því síðla árs 1979 og fram í febrúar 1980.
Eftir þingsetu var Kjartan skipaður sendiherra árið 1989 og gegndi hann stöðu fastafulltrúa Íslands gagnvart Sameinuðu þjóðunum í Genf til 1994. Utanríkisráðherrar EFTA-landanna völdu hann svo framkvæmdastjóra samtakanna og gegndi hann því starfi til ársins 2000. Hann var síðan fastafulltrúi Íslands í Brussel gagnvart ESB frá 2002-2005.
Eftirlifandi eiginkona Kjartans er Irma Karlsdóttir, fædd 1943. Dóttir þeirra er María Eva Kristína, viðskiptafræðingur og hagfræðingur, búsett í Bandaríkjunum.
