Kerecis er metið á 15 milljarða króna um þessar mundir. Þetta kemur fram í þættinum Viðskipti með Jóni G. á Hringbraut en þar ræðir Jón G. Hauksson við Guðmund Fertram Sigurjónsson, forstjóra Kerecis, en fyrirtækið hyggst leggja stóraukið fé í sölustarfsemi í Bandaríkjunum og ná þar stærri hlutdeild á sístækkandi markaða lækningavara.
Kerecis hefur þegar vakið mikla athygli lækna vestanhafs fyrir sáraroðið sem það framleiðir en það hefur reynst afar vel við sárum sem gróa illa, t.d. á fótleggjum fólks sem glímir við sykursýki og offitu. Þá hefur það skilað árangri við brunasárum en fram kemur í þættinum að Kerecis er í eftirtektarverðu samstarfi við bandarískan herinn varðandi rannsóknir og þróun.
Að sögn Guðmundar verður velta Kerecis á þessu ári um 3 milljarðar króna en það er svipuð fjárhæð og nýtt lán sem fyrirtækið tryggði sér á dögunum. Lánið hyggst Kerecis nota til að stórauka sókn sína á Bandaríkjamarkaði og margfalda veltuna þar - en hann vegur yfir 90% af veltu fyrirtækisins og fer sístækkandi.
Kerecis fékk í síðustu viku viðurkenninguna Vaxtarsprotann frá Samtökum iðnaðarins en veltan fyrirtækisins jókst um 142 prósent á síðasta ári; sem er 2,4-földun. Það er vel gert.
Guðmundur og tengdir aðilar eru stærstu hluthafar í fyrirtækinu með samtals um þriðjungs hlut – sem metinn er þá á um 5 milljarða króna miðað við verðmatið á fyrirtækinu í heild.
