Katrínu Jakobsdóttur forsætisráðherra bárust hótanir á Seyðisfirði skömmu fyrir hádegið. Að því er fram kemur á vef Fréttablaðsins var Katrín færð afsíðis úr skoðunarferð sinni um Ferjuhúsið af lögreglumanni eftir að henni bárust hótanir frá íbúa á svæðinu.
Blaðamaður Fréttablaðsins er á svæðinu og segir hann að að andrúmsloftið hafi verið þungt. Var hún á leið í viðtal við Bylgjuna þegar lögreglumaður fór með hana afsíðis.
Var Katrín færð í varðskip Landhelgisgæslunnar um stundarsakir en hún er nú komin aftur frá borði og hefur eðlileg dagskrá hafist að nýju.
Fréttablaðið hefur eftir Kristjáni Ólafi Guðnasyni, yfirlögregluþjóni á svæðinu, að óvíst sé nákvæmlega í hverju hótanirnar fólust. „Þær voru þess eðlis að það þótti ástæða til að gæta fyllsta öryggis,“ segir hann.
